Ishki ister ministrligi maldyń óz betimen jaiylý máselesin sheshý kerektigin alǵa tartyp otyr, dep habarlaidy QazAqparat tilshisi.
«Bizde maldyń betaldy jaiý tájiribesi tarap ketti. Osy jyly mal urlyǵynyń 60 paiyzy maldyń uzaq ýaqyt boiy qaraýsyz jaiylýy saldarynan tirkelgen. Osy máseleni eskere otyryp, biz aimaqtarǵa mal urlyǵyna sep bolatyn osyndai sharttardy joiý týrasynda 1157 kórsetilim (usynys) joldaǵan bolatynbyz. Alaida buǵan eshqandai jaýap joq bolyp tur», - deidi Parlament Senatynda ótken dóńgelek ústel barysynda QR Ishki ister ministriniń birinshi orynbasary Janat Súleimenov.
Ol sonymen birge atalmysh máseleni sheshýdegi vedomstvonyń usynystaryn aityp ótti.
«Qaraýsyz malyn jaiǵany úshin mal ielerine qatysty eshqandai zańnamalyq norma qarastyrylmaǵan. Mine, sondyqtan, aimaq ákimdikterine aýyl sharýashylyǵy jaiylymy men ol úshin ákimshilik jaýapkershilik engizetindei quqyq berý usynysyn bastama retinde kóterip otyrmyz. Bul rette, álbette, malshylar kerek. Máselen, 100 iri qaraǵa bir malshynyń keregi anyq. Bálkim, mal jaiylymy retke keltiriletindei, olarǵa bir minimaldy kómek berý kerek pe?», - deidi vitse-ministr.
Sonymen birge, Janat Súleimenov maldyń qaraýsyz jaiylýyna bailanysty ekinshi máseleni de atap ótti.
«Biyl ǵana maldy basyp ketý jaǵdaiyna qatysty jol-kólik oqiǵalary 28 paiyzǵa ósken. Osynyń saldarynan qaza tapqandardyń sany 46 paiyzǵa ósti. Júzge tarta adam jaraqat aldy. Jaqynda ǵana Almaty - Taldyqorǵan tasjolynda 2 adam kóz jumdy. Belgi men chip bolmaǵannan keiin álgi ólimge sebep bolǵan jylqylardyń ieleri áli de tabylatyn emes», - dep túidi Janat Súleimenov.
