Maqtaaral aýdanyndaǵy topan sý shaiǵan Órgebas pen Firdaýsi aýyldarynda qabyrǵalary shytynaǵan úiler men qora-qopsylardyń materialdaryn retteý jumystary bastaldy, – dep habarlaidy Túrkistan oblysy ákimdiginiń baspasóz qyzmeti.
Aldaǵy eki-úsh kúnde turǵyndar jańa úilerdiń irgetastaryn qalaýǵa kirispek. Ol úshin eski materialdardan qalyp jasaý jumystary qyza túsken. Maqtaaral aýdanynyń ákimi Baqyt Asanovtyń aitýynsha, qazirgi tańda sý basqan 5 aýylda túgendeý jumystary júrip jatyr. Bul ispen arnaiy jumysshy toby ainalysýda.
«Dál qazirgi ýaqytta biz topan sý shaiǵan 5 aýyldaǵy úilerdi túgendeý jumystaryn júrgizip jatyrmyz. Eki-úsh kúnde qansha úidiń buzylǵany, qaita salynatyny belgili bolady. Sol kezde bul týraly málimetti jalpyǵa ortaq etip, jariia etemiz. Ázirge turǵyndar ýaqytty tiimdi paidanalyp, sý shaiǵan aýlalaryn kúl-qoqystan tazartyp, qulaǵan úiler men qora-qopsylaryn retke keltirip jatyr», - deidi Baqyt Nasyrhanuly.
Aita keteiik, Órgebas pen Firdaýsi eldi mekenderiniń turǵyndary eshqaida kóshirilmeidi.
Sondai-aq, olar úileriniń qurylystaryn ózderi júrgizetin bolady. Iaǵni, buzylǵan úilerdiń ótemaqysy turǵyndarǵa úkimettik rezervten kezeń-kezeńimen aýdarylyp otyrady.
Taiaýda ǵana Úkimettik komissiia men turǵyndardyń kezdesýinen keiin osyndai sheshim qabyldanǵan bolatyn.
