2027 jylǵy 1 qańtardan bastap Qazaqstanda jerleýge arnalǵan birjolǵy tólem taǵaiyndaý tártibi ózgeredi. Endi járdemaqy otbasynyń áleýmettik ál-aýqat deńgeiine qarai beriledi. Ál-aýqaty joǵary jáne aýqatty sanattaǵy otbasylar bul tólemdi ala almaidy, dep habarlaidy ult.kz Uchet.kz saityna silteme jasap.
Úkimet qaýlysymen bekitilgen jańa tártipke sáikes, jerleýge arnalǵan birjolǵy tólem respýblikalyq biýdjetten jasy boiynsha zeinetaqy, memlekettik bazalyq zeinetaqy tólemi nemese memlekettik áleýmettik járdemaqy alýshy qaitys bolǵan jaǵdaida beriledi. Tólemdi marqumnyń otbasy nemese ony jerlegen adam ala alady.
Jerleý járdemaqysynyń mólsheri qansha bolady?
2027 jyldan bastap tólem mólsheri tiisti qarjy jylyna belgilengen 35 ailyq eseptik kórsetkishti (AEK) quraidy. Al Uly Otan soǵysynyń ardageri qaitys bolǵan jaǵdaida 36,6 AEK tólenedi.
2027–2029 jyldarǵa arnalǵan respýblikalyq biýdjet jobasynda AEK mólsheri 4 693 teńge bolyp belgilengen. Eger bul kórsetkish ózgerissiz bekitilse, jerleý járdemaqysy 164 255 teńge, al Uly Otan soǵysynyń ardagerine qatysty tólem 171 763,8 teńge bolady.
Qazir AEK mólsheri 4 325 teńge bolǵandyqtan, jerleýge beriletin tólem 151 375 teńgeni quraidy.
Kimder járdemaqy ala almaidy?
Jańa erejege sáikes, áleýmettik ál-aýqaty joǵary sanalatyn A sanatyndaǵy jáne aýqatty dep tanylǵan V sanatyndaǵy otbasylarǵa jerleý járdemaqysy berilmeidi.
Sonymen qatar tólem alý úshin ótinish berýshi men otbasynyń kámeletke tolǵan músheleri derbes derekterdi jinaýǵa, óńdeýge, tekserýge, jańartýǵa jáne berýge kelisim berýi kerek.
Bul kelisim banktik jáne zańmen qorǵalatyn ózge de qupiia málimetterdi, sondai-aq kredittik biýrodaǵy aqparatty tekserýge múmkindik beredi. Atap aitqanda, nesieniń jalpy somasy, ai saiynǵy tólem, merzimi ótken bereshek pen qalǵan qaryz týraly derekter eskeriledi.
Osy málimetter negizinde otbasynyń áleýmettik ál-aýqat deńgeii baǵalanady.
Jańa qaýly 2027 jylǵy 1 qańtardan bastap kúshine enedi.
