2021 jyly Qazaqstannyń jańa Sý kodeksi ázirlenedi. Bul týraly QR Ekologiia, geologiia jáne tabiǵi resýrstar ministri Maǵzum Myrzaǵaliev aitty, dep habarlaidy "Ult aqparat".
«Kóptegen sarapshylardyń baǵalaýynsha, sý zańnamasy odan ári jetildirýdi talap etedi. Qoldanystaǵy kodekske on jeti jyl ishinde 62 ret ózgerister men tolyqtyrýlar engizildi. Nátijesinde quqyq qoldaný rettiliginiń joǵalýy baiqalady. Bul tutastai alǵanda sý sharýashylyǵynyń barlyq deńgeilerinde jaǵdaidyń nasharlaýyna ákeledi», - dedi ol Senat Tóraǵasynyń orynbasary Asqar Shákirovtiń tóraǵalyǵymen ótip jatqan Úkimet saǵatynda.
Sonymen qatar ministr kodeks sý sharýashylyǵy qurylystaryn jobalaý, salý jáne paidalanýdyń tehnikalyq máselelerin rettemeitindigin atap ótti.
«Bul máseleler ártúrli qurylys normalary jáne erejelerimen, ministrlikter men vedomstvolardyń buiryqtarymen retteledi. Osy rette Gidrotehnikalyq qurylystarǵa qatysty qaýipsizdik máseleleri arnaiy zańmen rettelýi tiis. Osyny eskere otyryp, 2021 jylǵa jańa Sý kodeksiniń jáne «Gidrotehnikalyq qurylystardyń qaýipsizdigi týraly» Zańynyń tujyrymdamalaryn ázirleý josparlanǵan. Budan basqa, sý resýrstaryn ulǵaitýdyń balama joldaryn paidalaný, ónerkásipte, aýyl jáne kommýnaldyq sharýashylyqta sýdy paidalaný tiimdiligin arttyrý, sondai-aq sý resýrstaryn eldiń sý tapshylyǵy bar óńirlerine jiberý múmkindigin zertteýge baǵyttalǵan ǵylymi blok qalyptastyryldy», - dedi Maǵzum Myrzaǵaliev.
