Ekologiia, geologiia jáne tabiǵi resýrstar ministri Maǵzum Myrzaǵaliev tabiǵatqa qatigezdik tanytqan jáittermen qalai kúresý kerektigin aityp berdi, dep habarlaidy QazAqparat.
«Ókinishke qarai, sońǵy aptada biz tabiǵatqa qatigezdik tanytqan birneshe jaitqa kýá boldyq. Bul - barshamyzǵa belgili Aqtaýdaǵy itbalyqty uryp-soǵý, Býrabaida úiilip jatqan qoqys, Almaty mańynda Pervomaida jaiqalyp óskene Qyzyl kitapqa engen lotosty julyp alyp, jelige jariialaý, sondai-aq biregei Kóbeituz kólinen tuz urlap, satý faktileri. Bul - tek bizge belgili bolǵan jaittar», - dedi Maǵzum Myrzaǵaliev OKQ-da ótken baspasóz máslihatynda.
Ministrdiń aitýynsha, bul máselemen kúresýdiń tásili bar.
«Birinshi, bul - ekologiialyq bilim berý. Biz halyqtyń ekologiialyq oi-sanasyn ózgertip, ózimiz úlgi bolyp, balalardy tabiǵatqa uqypty qaraýdy úiretýimiz kerek. Mysaly, sol qoqysty ózimen birge alyp ketý, ásirese ony órtemeý, balalardy ósimdikter men janýarlardy kútýge úiretý, iaǵni ózimiz tabiǵat qorǵaý qyzmetine belsene qatysýymyz kerek. Aǵash otyrǵyzyp, jan-janýarlardy barynsha qorǵaýymyz qajet. Osynyń bári balalyq shaqtan bastalady. Sondyqtan da, Memleket basshysy Bilim ministrligine mektepte balalarǵa ekologiialyq bilim beretin jańa pán engizýdi tapsyrdy. Bul jóninde Prezident Qasym-Jomart Kemeluly búgin tańerteń óziniń Twitter akkaýntynda habarlady», - dedi ol.
Ministrdiń aitýynsha, ekinshi ádis - aiyppul salý.
«Sońǵy kúnderi týrister legi kóbeigenin baiqaimyz. Biraq, olar barǵan jerinde kóp qoqys qaldyryp jatyr. Bizge jii qoqys salatyn ydys ornatý týraly usynys aityldy. Biraq, tájiribe kórsetkendei, biz neǵurlym kóp bak qoisaq, soǵurlym azamattar kóp qoqys shashady. Osyǵan orai, biz aiyppul salýǵa májbúrmiz. Biz ishki ister ministirligimen birge osy máseleni pysyqtadyq. Osy demalys kúnderinen bastap jaǵdaidy monitoringteý jáne birden, jergilikti jerde shara qabyldaý úshin ulttyq parkter men demalys aimaqtary boiynsha reid júrgizemiz. Qoqys tastaýshylarǵa aiyppul salamyz! Reidterge bizben birge ekologtar, qoǵam belsendileri men eriktiler shyǵady», - dedi ol.
