Qaldyqtardy qaita óńdeý úlesin 40 paiyzǵa jetkizý josparlanýda. Bul týraly Ekologiia, geologiia jáne tabiǵi resýrstar ministri Maǵzum Myrzaǵaliev aitty, dep habarlaidy QazAqparat.
«Memleket basshysy Qasym-Jomart Toqaev ekologiia máselelerine erekshe nazar aýdarǵanyn barshamyz bilemiz. Jaqynda ol bizdiń ministrlikke eki mańyzdy mindetti qoidy: «Waste to Energy» tehnologiiasyn engizý úshin zańnamalyq baza men qolaily jaǵdailardy qamtamasyz etýdi, sonymen qatar eldi mekenderdiń mańynda zańsyz qoqystardy tastaýǵa jol bermeý jáne ony joiý boiynsha júieli sharalardy qabyldaýdy tapsyrdy», - dedi Maǵzum Myrzaǵaliev OKQ-da ótken baspasóz máslihatynda.
Ministr Memleket basshysynyń «Waste to Energy» tehnologiiasynyń zańnamalyq turǵyda engizý jónindegi tapsyrmasyna qatysty ministrlik birqatar jumys atqarǵanyn eske saldy.
«Men birneshe ret aitqandai, elimizde qaldyqtardy qaita óńdeý úlesi óte tómen. Bar-joǵy 15 paiyz ǵana. Al Eýropa elderinde bul kórsetkish 2 ese, iaǵni orta eseppen 30 paiyzdy quraidy. «Jasyl ekonomika» tujyrymdamasyna sáikes biz bul kórsetkishti 2030 jylǵa qarai 40 paiyzǵa deiin jetkizýimiz kerek. Alaida búgin Qazaqstanda qoqys shyǵarý tarifteri tómen jáne ol jerde qatty turmystyq qaldyqtardy qaita óńdeý – kádege jaratý shyǵyndary eskerilmegen. Sondyqtan bul salanyń investitsiialyq tartymdylyǵy óte tómen», - dedi ol.
Maǵzum Myrzaǵaliev negizi «Waste to Energy» tehnologiiasy jeke investorlardy qyzyqtarytynyn aitady. Óitkeni qoqystardy jaǵý nátijesinde elektr energiiasy óndirilip, jalpy elektr jelisine satylady. Kelesi jyly osyndai zaýyt qurylysyna investorlar arasynda ashyq aýktsion ótkizý josparlanyp otyr.
«Elektr energiiasynyń eń az qunyn kim usynsa, sol aýktsionnyń jeńimpazy bolyp atalady. Memleket basshysynyń tapsyrmasy boiynsha tiisti zań jobasy ázirlendi. Májilis ony maquldady. Kúzde Parlament Senatynda qaralady», - dedi ol.
