QR Qarjy naryǵyn retteý jáne damytý agenttiginiń tóraǵasy Mádina Ábilqasymova Madina Abylqasymova shaǵyn jáne orta kásipkerlik sýbektilerin qarjylandyrý týraly aitty, dep habarlaidy QazAqparat.
Onyń sózine qaraǵanda, basty basymdyq ShOB sýbektileriniń nesie alýǵa múmkindigin arttyrý bolyp otyr.
«Ulttyq bank Agenttikpen birige otyryp ShOB sýbektilerin qoldaý maqsatynda biyl naýryzda ainalym kapitalyn tolyqtyrýǵa jeńildikpen nesie berý baǵdarlamasyn ashty. Osy baǵdarlama aiasynda ShOB sýbektilerin nesielendirýge 8% paiyzdyq mólsherlememen 600 mlrd teńge qarastyrylǵan. Memleket basshysynyń tapsyrmasymen iri kásipkerlik nysandaryn qoldaýǵa taǵy 200 mlrd teńge bólindi. Búginde jalpy somasy 448,9 mlrd teńge bolatyn 4361 nesie berildi», - dedi Mádina Ábilqasymova.
Onyń aitýynsha, «Biznestiń jol kartasy-2025» aiasynda nesie mólsheri 2,5 mlrd teńgeden 7 mlrd teńgege ósken.
«Memleket basshysynyń tapsyrmasymen qazan aiynan bastap pandemiianyń kesirinen turalap qalǵan saladaǵy ShOB sýbektileri nesiesiniń 6 paiyzyna sýbsidiia qarastyrylǵan», - dedi Mádina Ábilqasymova.
Jalpy memlekettik baǵdarlamalar boiynsha kásipkerlerge biyl quny 1 mlrd teńge bolatyn 8,5 myń nesie berildi.
«Bul sharalar ekonomikalyq belsendilik toqtaǵan kezde nesielendirý kólemin arttyrýǵa múmkindik berdi. Sáýir-shilde ailarynda nesielendirý qarqyny tómen bolsa, tamyz aiynan bastap kórsetkish kóterile bastady. 2020 jyldyń 9 aiynyń qorytyndysyna sáikes ekonomikany nesielendirý 3,5%-ǵa ósti», - dedi Agenttik basshysy.
Sonymen qatar, Ulttyq bank, Qarjylyq naryqty retteý men damytý agenttigi, QR Úkimeti tarapynan qaryz júktemesin azaitý maqsatynda keibir nesielerdi tóleý ýaqyty uzartyldy.
TJ kezinde 16 naýryzdan 1 qazanǵa deiin 13 myń ShOB sýbektisi, 1,9 mln azamattyń nesieni tóleýi keiinge qaldyryldy.
