Sońǵy kúnderi dollar baǵamynyń ósýi álemdik naryqtaǵy munai baǵasymen bailanysty. Bul týraly ulttyq bank tóraǵasynyń orynbasary Mádina Ábilqasymova aitty, dep habarlaidy Sputnik Qazaqstan tilshisi.
Onyń aitýynsha, ulttyq bank 3 maýsymda kezekti boljamdyq raýnd ótkizip, bazalyq mólsherlemeni sol kúiinde – 9% deńgeiinde qaldyrǵan.
"Qazir teńgeniń erkin aiyrbas baǵamy rejimi aiasynda valiýtanyń ózgerisi bolyp jatyr. Bul, eń aldymen, munai baǵasyna bailanysty. Álemniń iri ekonomikalary arasyndaǵy saýda teketiresiniń kúsheiýinen álemdik naryqtarda Brent markaly munaidyń baǵasy túskenin kórip otyrmyz. Tiisinshe, bul damyp jatqan naryqtardyń valiýtalaryna áser etip jatyr", - dedi ol májilis kýlýarynda.
Osy oraida BAQ ókilderi Ábilqasymovadan elde kezekti devalvatsiia bola ma dep surady. Ol teńge baǵamy aitarlyqtai qubylsa, ulttyq bank tiisti sharalar qabyldaitynyna sendirdi.
"Aiyrbas baǵamy aitarlyqtai qubylǵan jaǵdaida ulttyq bank valiýtalyq interventsiia júrgizýge quqyly. Biz jaǵdaidy muqiiat baqylap otyrmyz", - dedi ol.
Aita ketsek, qazir valiýta aiyrbastaý pýnkterinde bir dollar 384-386 teńgege satylyp jatyr.
