سوڭعى كٷندەرٸ دوللار باعامىنىڭ ٶسۋٸ ەلەمدٸك نارىقتاعى مۇناي باعاسىمەن بايلانىستى. بۇل تۋرالى ۇلتتىق بانك تٶراعاسىنىڭ ورىنباسارى مەدينا ەبٸلقاسىموۆا ايتتى, دەپ حابارلايدى Sputnik قازاقستان تٸلشٸسٸ.
ونىڭ ايتۋىنشا, ۇلتتىق بانك 3 ماۋسىمدا كەزەكتٸ بولجامدىق راۋند ٶتكٸزٸپ, بازالىق مٶلشەرلەمەنٸ سول كٷيٸندە – 9% دەڭگەيٸندە قالدىرعان.
"قازٸر تەڭگەنٸڭ ەركٸن ايىرباس باعامى رەجيمٸ اياسىندا ۆاليۋتانىڭ ٶزگەرٸسٸ بولىپ جاتىر. بۇل, ەڭ الدىمەن, مۇناي باعاسىنا بايلانىستى. ەلەمنٸڭ ٸرٸ ەكونوميكالارى اراسىنداعى ساۋدا تەكەتٸرەسٸنٸڭ كٷشەيۋٸنەن ەلەمدٸك نارىقتاردا Brent ماركالى مۇنايدىڭ باعاسى تٷسكەنٸن كٶرٸپ وتىرمىز. تيٸسٸنشە, بۇل دامىپ جاتقان نارىقتاردىڭ ۆاليۋتالارىنا ەسەر ەتٸپ جاتىر", - دەدٸ ول مەجٸلٸس كۋلۋارىندا.
وسى ورايدا باق ٶكٸلدەرٸ ەبٸلقاسىموۆادان ەلدە كەزەكتٸ دەۆالۆاتسييا بولا ما دەپ سۇرادى. ول تەڭگە باعامى ايتارلىقتاي قۇبىلسا, ۇلتتىق بانك تيٸستٸ شارالار قابىلدايتىنىنا سەندٸردٸ.
"ايىرباس باعامى ايتارلىقتاي قۇبىلعان جاعدايدا ۇلتتىق بانك ۆاليۋتالىق ينتەرۆەنتسييا جٷرگٸزۋگە قۇقىلى. بٸز جاعدايدى مۇقييات باقىلاپ وتىرمىز", - دەدٸ ول.
ايتا كەتسەك, قازٸر ۆاليۋتا ايىرباستاۋ پۋنكتەرٸندە بٸر دوللار 384-386 تەڭگەگە ساتىلىپ جاتىر.
