IX Azamattyq forýmda belgili aqyn, akselerator sarapshysy Maqpal Jumabai mádeniet jáne óner jobalaryn júieli damytý máselelerin aitty, dep habarlaidy QazAqparat.
«Jalpy «Rýhani jańǵyrý» baǵdarlamasy degende eń aldymen kóz aldymyzǵa mádeniet salasyndaǵy jobalar keledi. Biraq osy akselerator óziniń jan-jaqtylyǵymen, «Rýhani jańǵyrý» ideiasynyń printsipterin keńeitýimen qoǵamǵa erekshe kózqaras ákeldi dep oilaimyn. Bul akseleratsiia 6 baǵyt boiynsha júrdi, alty baǵyt ta qoǵamda ózekti bolyp sanalady. Sonyń ishinde maǵan mádenietke qatysty jobalardy baqylap-qadaǵalap, sarapshylyq oilarymdy ortaǵa salýǵa múmkindik berdi. Mádeniet jáne óner salasy boiynsha besten asa joba masshtabtaýǵa daiyn tur», - dedi Maqpal Jumabai.
Onyń ishinde qazaq dizainerleriniń jańasha kózqarasyn álemge tanytatyn ASPARA FASHION WEEK, tarihi-rekonstrýktsiialyq «Temir túmen» klýby, «Qazaqtardyń materialdyq emes mádeni murasy», «Nomad» jobalary bar.
«Ári qarai qazaq mádenietin qai turǵyda, qalai damytýǵa bolady degen suraqtarǵa aldaǵy 5-10 jylǵa ózimiz úshin mejeler qoidyq. Osynyń barlyǵy azamattyq qoǵam men memlekettiń birlesýi arqyly júzege asqany qýantady. Óitkeni, osy turǵyda memlekettiń pozitsiiasyn anyq kórdik. Buryn kórermen retinde, synshy retinde barlyǵyna syni kózben qarap júrsek, munda belgili bir deńgeide zań jasaýshy, zańǵa ózgeris engizýshi, qurylymdardy ózgertýshi rólinde kóre aldyq. Osy akseleratsiiadan ótken 20 joba barlyq turǵyda óz múmkindikterin kórsetti, memleket aldynda óziniń bolashaqta qalai damitynyn tolyq dáleldedi», - deidi spiker.
Onyń aitýynsha, bul jobalar akselerator bitken soń da naryqta dami alady, biraq memleketpen seriktestikte damityn bolsa, memlekettiń utary kóp bolady.
«Akselerator esh qarajat bergen joq, biraq sonda da jobalar úlken qyzyǵýshylyqpen sońyna deiin jetti. Endi bolashaqta qarjylandyrý kózderiniń formasyn tabý kerek dep esepteimin. Óitkeni bul jobalardy memleket tarapynan qarjylandyrýǵa jáne basqa da qarjy kózderin tartýǵa bolady. Masshtabtaý týraly da búgin tereń oilar aityldy, aldaǵy jyly sonyń kýási bolsaq dep oilaimyz. Sarapshylar qaýymdastyǵy resmi jumysyn toqtatsa da, beiresmi túrde dami beredi», - dedi Maqpal Jumabai.
