Belarýstyń avtokrat lideri Aleksandr Lýkashenko elde "bilik tranziti bolmaidy" dedi. Lýkashenko bul sózin elde óziniń bilikten ketýin talap etip jatqan narazylyqtar men qarsylyq órship turǵan tusta aitty, dep habarlaidy Azattyq.
"Belarýste bilik tranziti bolýy múmkin emes. Barlyǵy Konstitýtsiiaǵa sai bolady. Buryn aiqanymdai, jańa Konstitýtsiia jobasy kelesi jyldyń qańtar-aqpan aiynda usynylady. Bilik tranziti jaily qazirgi bar sóz osy" dedi Lýkashenko 2 naýryzda Resei prezidenti Pýtinmen kezdesýi jaily aitqan sózinde.
Lýkashenko 9 tamyzda ótken sailaýda jeńimpaz dep tanylǵan, biraq onyń basty qarsylasy Svetlana Tihanovskaia onyń jeńisin moiyndamaǵan. Sodan beri myńdaǵan adam narazylyqqa shyǵyp, daýys berý nátijesin joiýdy talap etti. Politsiia men arnaiy jasaq narazylardy kúshtep ustap, soqqan. Eýropa odaǵy eldi 26 jyldan beri bilep otyrǵan Lýkashenkonyń jeńisin moiyndamai, Belarýske sanktsiia saldy.
Lýkashenko buǵan deiin ózin Máskeýden alshaq ustap júrgenimen, jeti aidan beri jalǵasyp kele jatqan narazylyq pen EO sanktsiiasynan soń qaita Pýtinniń qoldaýyna iek artyp júr.
Máskeý keiingi ýaqytta Belarýsti 20 jyl buryn qol qoiylǵan odaqtas respýblika kelisimin oryndaýǵa úgittep, qysymdy kúsheitken. Biraq Lýkashenko bul usynysty qoldamai kelgen. 2 naýryzda Lýkashenko Belarýs "táýelsiz el retinde qala beretinin" taǵy aitty.
