بەلارۋستىڭ اۆتوكرات ليدەرٸ الەكساندر لۋكاشەنكو ەلدە "بيلٸك ترانزيتٸ بولمايدى" دەدٸ. لۋكاشەنكو بۇل سٶزٸن ەلدە ٶزٸنٸڭ بيلٸكتەن كەتۋٸن تالاپ ەتٸپ جاتقان نارازىلىقتار مەن قارسىلىق ٶرشٸپ تۇرعان تۇستا ايتتى, دەپ حابارلايدى ازاتتىق.
"بەلارۋستە بيلٸك ترانزيتٸ بولۋى مٷمكٸن ەمەس. بارلىعى كونستيتۋتسيياعا ساي بولادى. بۇرىن ايقانىمداي, جاڭا كونستيتۋتسييا جوباسى كەلەسٸ جىلدىڭ قاڭتار-اقپان ايىندا ۇسىنىلادى. بيلٸك ترانزيتٸ جايلى قازٸرگٸ بار سٶز وسى" دەدٸ لۋكاشەنكو 2 ناۋرىزدا رەسەي پرەزيدەنتٸ پۋتينمەن كەزدەسۋٸ جايلى ايتقان سٶزٸندە.
لۋكاشەنكو 9 تامىزدا ٶتكەن سايلاۋدا جەڭٸمپاز دەپ تانىلعان, بٸراق ونىڭ باستى قارسىلاسى سۆەتلانا تيحانوۆسكايا ونىڭ جەڭٸسٸن مويىنداماعان. سودان بەرٸ مىڭداعان ادام نارازىلىققا شىعىپ, داۋىس بەرۋ نەتيجەسٸن جويۋدى تالاپ ەتتٸ. پوليتسييا مەن ارنايى جاساق نارازىلاردى كٷشتەپ ۇستاپ, سوققان. ەۋروپا وداعى ەلدٸ 26 جىلدان بەرٸ بيلەپ وتىرعان لۋكاشەنكونىڭ جەڭٸسٸن مويىنداماي, بەلارۋسكە سانكتسييا سالدى.
لۋكاشەنكو بۇعان دەيٸن ٶزٸن مەسكەۋدەن الشاق ۇستاپ جٷرگەنٸمەن, جەتٸ ايدان بەرٸ جالعاسىپ كەلە جاتقان نارازىلىق پەن ەو سانكتسيياسىنان سوڭ قايتا پۋتيننٸڭ قولداۋىنا يەك ارتىپ جٷر.
مەسكەۋ كەيٸنگٸ ۋاقىتتا بەلارۋستٸ 20 جىل بۇرىن قول قويىلعان وداقتاس رەسپۋبليكا كەلٸسٸمٸن ورىنداۋعا ٷگٸتتەپ, قىسىمدى كٷشەيتكەن. بٸراق لۋكاشەنكو بۇل ۇسىنىستى قولداماي كەلگەن. 2 ناۋرىزدا لۋكاشەنكو بەلارۋس "تەۋەلسٸز ەل رەتٸندە قالا بەرەتٸنٸن" تاعى ايتتى.
