Foto: Orda.kz
Izdeýde júrgen LRT eks-basshysy Talǵat Ardan taǵy da syrttai sottaldy. Bul týraly Astana qalasynyń qylmystyq ister jónindegi aýdanaralyq soty habarlady.
Is sottalýshyǵa qatysty halyqaralyq izdestirý jariialanǵandyqtan onyń qatysýynsyz syrttai qaraldy.
Atalǵan sot taratqan habarlamaǵa qaraǵanda LRT eks-basshysy Talǵat Ardan qyzmet múddelerine qaishy laýazymdyq ókilettikterin teris paidalana otyryp, naqty qajettiliksiz LRT qurylys jobasy boiynsha Qytaidyń memlekettik damý syrtqy qaryzdyń birinshi transhy retinde 257,6 mln AQSh dollaryn zańsyz suratqan. Qarajat túsken sátten bastap olar joba boiynsha paidalanylmaǵan degen aiyp taǵylǵan.
«A. buryn Astana qalasynyń qylmystyq ister jónindegi mamandandyrylǵan aýdanaralyq sotynyń 03.05.2023 jylǵy úkimimen asa iri mólsherinde biýdjet qarajatyn talan-tarajǵa salǵany úshin (QK 189-baby 4-bóliginiń 2) tarmaǵy) syrttai memlekettik qyzmette qyzmet atqarý quqyǵynan ómir boiyna aiyryla otyryp, 7 jylǵa bas bostandyǵynan aiyryldy. Sottalýshynyń kinási kýágerlerdiń aiǵaqtarymen, sarapshylar men mamandardyń qorytyndylarymen, qylmystyq istiń materialdarymen rastaldy. Sot úkimimen A. QK 361-baby 4-bóliginiń 3) tarmaǵy boiynsha kináli dep tanylyp, 4 jyl 8 aiǵa bas bostandyǵynan aiyryldy jáne QK 58-babynyń 6-bóligi qoldanylyp, sottyń 03.05.2023 jylǵy úkimi boiynsha taǵaiyndalǵan jazany ishinara qosý arqyly túpkilikti memlekettik qyzmette qyzmet atqarý quqyǵynan ómir boiyna aiyra otyryp, 9 jylǵa bas bostandyǵynan aiyrý jazasy taǵaiyndaldy», - delingen habarlamada.
Úkim zańdy kúshine engen joq.
Eske salsaq, biyl shildede Sybailas jemqorlyqqa qarsy is-qimyl agenttigi Talǵat Ardandy BAQ arqyly jaýap alýǵa shaqyrǵan edi. Biraq atalǵan tulǵa jaýap berýge ýaqytynda kelmegen.
Ótken jyly mamyrda elordada salynbai qalǵan Astana LRT qurylysyna qatysty qylmystyq is boiynsha sot úkimi shyqty. Sot úkimimen Talǵat Ardan men Qanat Sultanbekov 7 jylǵa sottaldy.
Bas prokýratýra Talǵat Ardan men Qanat Sultanbekovti izdeý jumysynyń toqtamaitynyn aitty.
