Qazir Liviianyń memlekettiligi joq. Ony 2011 jyly NATO joidy, dep málimdeme jasady Reseidiń syrtqy ister ministri Sergei Lavrov. Bul týraly RIA Novosti basylymy habarlady.
"Bul soqyr táýekeldiń - qylmystyq, zańǵa qaishy táýekeldiń saldaryn biz áli kúnge deiin kórip otyrmyz. Eń aldymen, árine liviialyqtar kórip otyr", - dedi ol lankalyq áriptesi Dinesh Gýnadevardenmen ótken kelissózder qorytyndysy boiynsha baspasóz máslihatynda.
Buǵan qosa, Lavrov alians jasaǵan problemany kóptegen el sheshýge tyrysyp jatyr deidi. Bul elder qatarynda Germaniia, Frantsiia, Italiia, Aljir, Egipet, Birikken Arab Ámirlikteri, Túrkiia, Qatar, Resei bar.
Taiaýda Máskeýde liviiaaralyq kelissózder ótti. Taraptar aimaqtaǵy deeskalatsiia múmkindigi men sharttaryn talqylady. Degenmen konsensýsqa qol jetkizilgen joq. Sebebi bitim týraly qorytyndy qujatqa barlyq qatysýshy qol qoimady. Naqtylasaq, Liviia ulttyq áskeriniń basshysy, marshal Halifa Haftar óz qolyn qoiǵan joq.
Liviiadaǵy jaǵdai
2011 jyly basshylyǵynda Amerika Qurama Shtattary men NATO bolǵan halyqaralyq qaýymdastyq Liviiada operatsiia ótkizdi. Onyń nátijesinde Mýamar Kaddafi óltirilip, 40 jyldan astam ýaqyt boiy ústemdik etken rejim qulady.
Osydan keiin elde ashyq daǵdarys bastaldy. Shyǵysta, Tobrýk qalasynda halyq sailaǵan parlament jumys isteidi. Ony Haftar basqaratyn Liviia ulttyq áskeri qoldaidy. Batysta, Tripolide Birikken Ulttar uiymy jáne Eýroodaq qoldaýymen qurylǵan Ulttyq kelisim úkimeti jumys isteidi. Ony Faiez Sarradj basqarady.
Qos bilik jáne qaýipsizdik júiesindegi kúireý qarýlanǵan kóterilisshiler toptary men lańkestik uiymdar belsendiliginiń artýyna ákeldi. Liviia ortalyqtandyrylǵan bilik pen biryńǵai áskerdiń joqtyǵynan kontrabanda ortalyǵyna jáne Afrikadan Eýropaǵa baratyn zańsyz migranttardyń aialdaý beketine ainaldy.
2019 jyldyń tórtinshi sáýirinde Haftar "lańkesterden bosatý" úshin Tripolige shabýyl jasai bastady. Úkimetke adal qarýlanǵan jasaqtar jaýap retinde "Ashý janartaýy" operatsiiasynyń bastalǵany týraly habarlady. Sońǵy birneshe aida júzdegen adam qaza taýyp, myńdaǵany jaraqat aldy.
