Aqtóbedegi liftide mert bolǵan jýrnalist Aizat Ábdisamattyń isine qatysty sot otyrysy jalǵasyp jatyr. Jábirlenýshi tarap 5 million teńge moraldyq ótemaqy surady, dep habarlaidy QazAqparat tilshisi.
Aqtóbe qalalyq sotynda sottalýshy Jarylqasyn Aqjanov jábirlenýshi taraptan keshirim surap, óziniń kinásiz ekenin aitty.
"Men ózimdi kináli dep eseptemeimin. Al 5 million teńge moraldyq shyǵyndy tólei almaimyn. Ondai aqsham joq. Jaǵdaiym kelgenshe kómektese alamyn. Ózim jolaqy úshin 6 myń teńgege lift jóndegen adammyn", - dedi sottalýshy J.Aqjanov.
Al sottalýshy Kenen Janabekov óz kinásin moiyndamady, biraq jábirlenýshi suraǵan moraldyq ótemaqyny tolyq berdi.
Aita keteiik, qaza bolǵan Aizat Ábdisamattyń anasy Aisha Tólemisova sottalýshylarǵa keshirim beretinin jetkizdi.
"Men keshirim berdim. Negizi sottalýshylar sol kúni kelip, kóńil aityp, keshirim suraýy kerek edi. Al olar arada 7 ai ótkende ǵana úiime keldi", - dedi Aizat Ábdásamattyń anasy Aisha Tólemisova.
Eske salsaq, osy jyldyń sáýir aiynda jýrnalist Aizat Ábdisamat lift esigine qysylyp,kóz jumǵan edi. Osy oqiǵaǵa bailanysty Qylmystyq kodekstiń «Qaýipsizdik talaptaryna sai kelmeitin taýarlardy shyǵarý nemese satý, jumystardy oryndaý ne qyzmetter kórsetý» baby boiynsha aiyp taǵyldy.
Sot bastalmas buryn Aizat Ábdisamattyń anasy kináli adamdardyń jazalanýyn surady.
Erteń jaryssóz bolady.
