.jpg)
«Astana Opera» solisi Leila Alamanova Italiiada Djoakkino Rossinidiń «Reimske saiahat nemese «Altyn liliia» qonaq úii» spektaklinde zor jetistikpen óner kórsetti. Qoiýshy dirijer retinde Marko Hribernik, rejisser retinde Marin Blajevich ter tókti. Spektaklder Sloveniia men Italiia shekarasyndaǵy Goritsiia qalasynda ótip, ártisterdiń jarqyn halyqaralyq quramy men synshylardyń shattanǵan pikirlerin jinady.
Leila Alamanova úshin bul «Reimske» alǵashqy saiahat emes. Madam Korteze partiiasyn ol birneshe jyl buryn ańyzǵa ainalǵan Pezaro opera festivaline qatysqan kezde oryndaǵan edi.
"Álbette, osy spektaklde sahnaǵa qaita shyǵý úshin tolqyǵanym ras, bul joly basqa sahna jáne aitýly quram boldy. Buryn birge istegen áriptesterimmen qaita jolyqtyq. Bul degen naǵyz baqyt qoi", - deidi ánshi.
Alaida tanys partiia bolsa da, bul róldi jeńil dep aitýǵa bolmaidy. Dj.Rossini daýysqa da, tehnikaǵa da «talapshyl».
"Partiia óte oinaqy, keń diapazon men joǵary tessitýrany talap etedi. Meniń keiipkerim búkil spektakl boiy sahnada júredi ári vokaldyq turǵydan da ońai emes. Biraq qolymnan keldi degen oidamyn. Maǵan rejisser qoiǵan tapsyrmany oryndaý mańyzdy boldy".
Spektakldiń ózi vokaldyq qana emes, akrobatikalyq synaqqa ainaldy. Rejisserdiń túpki oiyna sáikes barlyq stsenografiia biik, alasa, syrǵanaq, qozǵalmaly baspaldaqtardan turdy. Ártister olardy kórinis kezinde jyljytyp, tipti, solarǵa órmelei júrip án aitty.
"Bul meniń ómirimdegi án aityp qana qoimai, dene shynyqtyrýmen ainalysýǵa týra kelgen alǵashqy qoiylym bolar, sirá", - dep kúldi Leila Alamanova. – "Biz sekirdik te, órmeledik te, qimyldadyq ta – osynyń bárinde vokaldy baqylaýda ustadyq. Sebebi kórermen qatelikti keshirmeidi".
Qiyndyqqa qaramastan, trýppa rejissermen shyǵarmashylyq dialog qura otyryp, qolaily atmosferada jumys istedi.
"Biz qolymyzdan kelmei jatsa nemese kedergi bolsa, ony ashyq aita aldyq. Sheshimin birge izdedik. Bul naǵyz seriktestikke uqsas boldy".
L.Alamanovanyń óner kórsetýi de nazardan tys qalmady. Spektaklge eki retsenziia jaryq kórdi, onda mýzykalyq synshylar qazaqstandyq ánshiniń ártistigi men jan-jaqtylyǵyn erekshe atap ótti.
"Barynsha kórnekti eki soprano arasynda aqyn Korinnanyń ánderindegi Iren Chelleniń talǵampazdylyǵy Ines Loranstyń oryndaýyndaǵy kúlkili, biraq shamadan tys doly grafinia Follevilden unamdyraq bolar. Alaida eki adam arasynda daý týyndaǵanda, ádettegidei, odan úshinshisi paida kóredi: Leila Alamanovanyń oryndaýyndaǵy Madam Korteze odan da jaqsy estiledi – vokaldyq turǵyda senimdi jáne sheberlikpen babyn taýyp, óziniń talapshyl qonaqtaryn basqara alatyn qonaq úi qojaiyny rólinde óte dál beinege enedi", - dep mýzykalyq synshy Paolo Patritsidiń maqalasynda jazylǵan.
"Italiia men Sloveniia jurtshylyǵynyń reaktsiiasy óte qyzý boldy", - deidi Leila Alamanova. - Zalda kóptegen mańyzdy adamdar boldy, bul rette óte jyly atmosfera ornady.
Al spektaklden keiin ánshige shetelde óner kórsetýge birneshe jańa usynystar kelip tústi, qazirgi ýaqytta ol olardy qarastyrýda.
"Mundai jobalar shynymen kókjiekti keńeitedi. Bul úirenshikti jailylyq aimaǵynan shyǵyp, kásibi turǵydan ósý múmkindigin beredi".
Eske sala keteiik, «Astana Opera» solisi Leila Alamanova Kúlásh Baiseiitova atyndaǵy Qazaq ulttyq óner ýniversitetiniń túlegi (dotsent Tatiana Rýdnevanyń klasy), sodan keiin belkantonyń tól besigi – Pezarodaǵy Djoakkino Rossini atyndaǵy memlekettik konservatoriiada, sondai-aq Ozimo óner akademiiasynda óz jolyn jalǵastyrdy. 2022 jyly ol tanymal Accademia Rossiniana – jas juldyzdar ustahanasynyń qatysýshysy boldy.
