Jer jánnaty Jetisýdan bastaý alyp, odan ordaly ońtústikke jetip, sonan soń kóne Tarazda jalǵasyn tapqan «Meniń elim – Máńgilik El» jastar aktsiiasy Alashqa ana, qazaqqa pana qasietti Syr óńirinde de óz dárejesinde ótti.
Búgingi bizdiń basty muratymyz Táýelsizdigimizdi tuǵyrly, memlekettiligimizdi ǵumyrly etý. Bul jolda jastarǵa artylatyn senim men jaýapkershiliktiń júgi zor. Óitkeni, azat Qazaqstannyń kemel keleshegi, Alash týynyń kún sóngenshe sónbeýi óskeleń urpaqqa tikelei bailanysty. Osy rette jastardy eljandylyqqa, memleketshildik sanaǵa tárbieleitin mundai sharalardyń mańyzy da arta túspek. Al elimiz boiynsha myńdaǵan jalyndy jas qatysqan sharanyń ótýine muryndyq bolǵan Qazaqstan halqy Assambleiasy ekenin aitqan abzal.
Qyzylorda qalasyndaǵy «Dostyq» úiiniń aldyndaǵy alańda el Táýelsizdiginiń 25 jyldyǵyna arnalǵan «Meniń elim – Máńgilik El» respýblikalyq jastar aktsiiasyna Qazaqstan halqy Assambleiasynyń músheleri, qoǵam qairatkerleri, etnomádeni birlestikter men ziialy qaýym ókilderi, jastar uiymdarynyń jetekshileri men stýdentter qatysty. Sharany saltanatty túrde ashqan oblys ákiminiń orynbasary Rýslan Rústemov táýelsizdik qundylyqtary jaiynda tereńnen tolǵap sóz sóiledi.
Aktsiianyń negizgi maqsatyn da aita keteiik. Atalǵan shara «Máńgilik El» jalpyulttyq patriottyq ideiasy men onyń qundylyqtaryn qazaqstandyq qoǵamda, ásirese, jastar arasynda nasihattap, sanalarǵa sińirip, Táýelsiz Qazaqstannyń qalyptasýy men damý jolynda elimizdiń barlyq aimaqtaryndaǵy jastardyń qosqan úlesin jáne jetistikterin kórsetý bolyp tabylady.
Aktsiia barysynda «Máńgilik El jastarynyń jetistikteri – Qazaqstan Respýblikasy Táýelsizdiginiń 25 jyldyǵyna» atty kitap aimaqtardy aralap júr. Onda Táýelsizdik jyldarynda jastardyń qol jetkizgen jetistikteri, óńirlerde jastarǵa jasalyp jatqan qamqorlyqtar, sondai-aq «Máńgilik El» Patriottyq ideiasynyń biriktirýshi róli týraly jazylǵan. Aktsiia aimaqtarda túgeldei ótip bolǵannan soń atalǵan kitap Tuńǵysh Prezident kúnine orai Elbasyna tabys etiledi.
Aqmeshittegi sharaǵa Astanadan Qazaqstan Respýblikasy Prezidenti janyndaǵy Qoǵamdyq kelisim respýblikalyq memlekettik mekemesiniń qyzmetkeri Maksim Spotkai arnaiy kelip, tilektestigin bildirdi. Qazaq tilinde taza sóilep, qyzylordalyq jastarǵa aktsiianyń máni men mańyzy týraly baiandaǵan ol Táýelsiz Qazaqstannyń jarqyn bolashaǵy úshin qyzmet isteý ár adamnyń paryzy ekenin aitty. Al «Jastar resýrstar ortalyǵynyń» jetekshisi Jasulan Aldabergenov jastardyń qoǵamda atqaryp jatqan jarqyn isterine toqtaldy. Munan soń Qazaqstan halqy Assambleiasy jastar qanatynyń tóraǵasy Konstantin Lýtsa Qyzylorda oblysy jastarynyń úndeýin oqyp berdi.
Onda «Biz – Elbasy Alashtyń anasyna balaǵan qasietti Syr óńiriniń jastary ata-babalarymyzdyń muratyn bekemdei túsip, zamandastarymyzdy bolashaq urpaq aldyndaǵy qasietti paryzymyzdy adal óteýge, beibitshilik pen kelisimniń, birlik pen tutastyqtyń mańyzdylyǵyn sezinýge, qoǵam men memlekettiń joǵarǵy múddelerin udaiy negizge alýǵa shaqyramyz» delingen. Al dziýdodan jastar arasyndaǵy álem chempiony Baýyrjan Jaýyntaev «Máńgilik El jastarynyń jetistikteri – Qazaqstan Respýblikasy Táýelsizdiginiń 25 jyldyǵyna» kitabyn Atyraý oblysynyń delegatsiiasyna saltanatty túrde tabystady. Aktsiia sońy án men jyrǵa ulasty.
Erjan BAITILES,
«Egemen Qazaqstan».
.jpeg)