Búgin Qyzylordada koronavirýsqa qarsy vaktsinanyń ekinshi dozasyn egý bastaldy, dep habarlaidy "Ult aqparat".
Aqpan aiynyń basynda óńirge «Spýtnik V» vaktsinasynyń 1 myń dozasy jetkizilip, ol jergilikti turǵyndarǵa egildi. Olardyń 939-y meditsina qyzmetkeri bolsa, 61-i basqa da erikti túrde kelgen qala turǵyndary.
Búgin taǵy 1 myń doza oblysqa jetkizilip, budan buryn ekpe qabyldaǵan azamattarǵa araǵa úsh apta salyp, ekinshi márte dozany egý jumystary júrgizilýde.
Sala mamandarynyń aitýynsha, bul jolǵy ekpe aldyńǵy vaktsinanyń áserin kúsheitedi. Ári aǵzadaǵy qorǵanysh qabiletin arttyrady.
«Ózim erikti túrde aqpannyń birinde alǵashqylardyń biri bolyp ekpeni saldyrdym. 21 kún ýaqyt ótse de ekpeniń esh keri áserin baiqamadym. Sol sebepti búgin ekpeniń ekinshi kezeńinen óttim. Biz búkil eldi dúrliktirgen koronavirýs infektsiiasyn turǵyndar saqtyq sharalaryn tolyq jasaǵanda ǵana jeńe alamyz. Al ekpeniń bul rette paidasy zor. Sondyqtan qazir halyq arasynda vaktsinalaýdyń mańyzy týraly túsindirý jumystaryn júrgizip jatyrmyz. Bul jumystar aldaǵy ýaqytta da jalǵasa bermek», - dedi oblystyq densaýlyq saqtaý basqarmasynyń basshysy Sábit Pazilov.
Aita keteiik, «Spýtnik V» reseilik vaktsinasynyń ekinshi dozasy qalalyq №1-shi, №3-shi jáne №6-shy emhanalarda júrgiziledi.
