Qyzylorda oblysy aýmaǵynda segiz adamnyń ómirin qiǵan «Qyzylorda-Qumkól» jolyndaǵy avtobýs apatyna bailanysty tiisti sala basshylary oqiǵanyń barysyn baiandap berdi, dep habarlaidy QazAqparat.
«Qutqarýshylar oqiǵa ornyna jete salysymen jol apatyna ushyraǵan azamattardy qutqarý sharalaryna kirisip ketti. Degenmen, 6.40-ta úsh adamnyń máiiti tabyldy. Arada 15 minýt ótkende taǵy bir adamnyń jansyz denesi syrtqa shyǵaryldy. Al 7.15-te qutqarýshylar eki adamnyń máiitin tapty. Qutqarýshylar 7 adamnyń denesin syrtqa shyǵardy. Barlyǵy «Saýts-oil» kompaniiasynda qyzmet atqarǵan. Bizge belgili bolǵandai, kompaniia árbir aidyń 2 jáne 17 kúnderi ujymda eńbek etetin mamandardy aýystyrý jumystaryn júrgizgen. Sondai mamandardy alyp kelgen 4 avtobýs keshe adamdardy alyp qaitqan. Keshe, 2 jeltoqsanda Qyzylorda oblystyq tótenshe jaǵdailar departamenti oblys aýmaǵynda kóktaiǵaq, tuman jáne qatty jel bolatyny jóninde uialy bailanys operatorlary arqyly habarlama taratqan bolatyn. Degenmen oǵan qaramastan qaýipsizdik sharalary saqtalmaýy saldarynan oqys oqiǵaǵa jol berilip otyr», - dep málim etti Qyzylorda oblystyq tótenshe jaǵdailar departamentiniń bastyǵy Omar Berjanov.
Taǵy bir adam jedel járdem kóliginde kóz jumdy. Qazirgi tańda kóz jumǵan azamattardyń jeke tulǵasy anyqtalýda. Oqiǵaǵa joldaǵy kóktaiǵaq sebepshi bolýy múmkin degen joramal aityldy.
«Bul oraida atalmysh kompaniianyń basshylyq quramy tiisti sala mamandarymen birlese jumys júrgizdi. Alǵashqy málimetterge súiensek, olar - Túrkistan oblysy men Shymkent qalasynda turatyn azamattar», - dedi Qyzylorda oblystyq politsiia departamenti bastyǵynyń birinshi orynbasary Shamshidin Ámitov.
Esterińizge sala ketelik, atalmysh oqiǵa búgin tańǵy 04.30 shamasynda boldy. Oqiǵa saldarynan 8 adam qaza taýyp, 21 adam emdeý oryndaryna jatqyzyldy.
Oqiǵaǵa bailanysty QR Ishki ister ministrligi túsinik berdi.
Sondai-aq, segiz adamnyń ómirin qiǵan «Qyzylorda-Qumkól» jolyndaǵy avtobýs apatyna bailanysty qylmystyq is qozǵaldy.
Memleket basshysy Qasym-Jomart Toqaev avtobýs apatynan kóz jumǵan marqumdardyń jaqyndaryna kóńil aitty.
