13 qarashada Jezqazǵan qalasynda 3 myń adamǵa arnalǵan Ulytaý oblysynyń jańa ortalyq meshiti saltanatty túrde ashyldy. Óńirdegi eń iri rýhani nysandardyń biri "Qazaqmys korporatsiiasy" JShS-niń qoldaýymen boi kóterdi, dep habarlaidy Ult.kz.
Saltanatty rásimge Qazaqstan musylmandary dini basqarmasynyń tóraǵasy, Bas múfti Naýryzbai qajy Taǵanuly, "Qazaqmys korporatsiiasy" JShS Baqylaý keńesiniń tóraǵasy Nurmuhambet Ábdibekov, korporatsiia basqarmasynyń tóraǵasy Rýslan Óskeneli, Ulytaý oblysynyń qurmetti azamattary, aqsaqaldar men merdiger uiym ókilderi qatysty.
Meshit qurylysy 2025 jyly bastaldy. Sol jyldyń shildesinde Bas múftidiń qatysýymen nysannyń alǵashqy kirpishi qalanyp, saltanatty rásim ótti. Jobanyń tapsyrys berýshisi – Qazaqstan musylmandary dini basqarmasy, al bas merdigeri – «Integra Construction» JShS. QMDB Tóralqasynyń sheshimimen meshitke «Ulytaý oblysynyń ortalyq meshiti» ataýy berildi.
Jańa meshit Jezqazǵan qalasynyń ortalyǵynda ornalasqan. Eki qabatty ǵimarattyń jalpy aýmaǵy shamamen 3 800 sharshy metrdi quraidy. Joba aiasynda nysanǵa irgeles 4 855 sharshy metr aýmaqty abattandyrý jáne kógaldandyrý jumystary da qarastyrylǵan. Meshit dini rásimder ótkizýmen qatar, óńir turǵyndaryna rýhani-aǵartýshylyq baǵytta qyzmet kórsetetin ortalyqqa ainalmaq.
"Búgin – Ulytaý oblysynyń rýhani ómirindegi airyqsha ári tarihi kún. Bul qasietti mekende boi kótergen jańa meshit halqymyzdyń tarih besigi sanalatyn Ulytaýdyń jarqyn kýágerine, izgilik pen rýhani qundylyqtardyń ordasyna ainalǵai", – dedi Bas múfti Naýryzbai qajy Taǵanuly.
Ortalyq meshittiń ashylýy «Qazaqmys» kompaniiasynyń qarjylai qoldaýymen júzege asqan mańyzdy áleýmettik jobalardyń biri boldy.
"Biz halqymyzdyń ǵasyrlar boiǵy dástúrin, urpaqtar sabaqtastyǵyn, izgilik pen adamgershilik qundylyqtaryn saqtaityn jańa rýhani ortalyqtyń esigin ashyp otyrmyz", – dedi "Qazaqmys korporatsiiasy" JShS Baqylaý keńesiniń tóraǵasy Nurmuhambet Ábdibekov.
«Ulytaý oblysyn damytý biz úshin erekshe mańyzǵa ie. Óndiristi jańǵyrta otyryp, biz árdaiym kompaniiamyzdyń basty qaǵidatyn — halyqtyń igiligi úshin eńbek etýdi basshylyqqa alamyz», — dep atap ótti «Qazaqmys korporatsiiasy» JShS Basqarma tóraǵasy Rýslan Óskenáli.
