Foto: ashyq derekkóz
Qyzylorda oblysy Jańaqorǵan aýdandyq soty 200 mln teńgeden astam biýdjet qarajatyn jymqyrǵan 9 adamǵa qatysty úkim shyǵardy.
Bul boiynsha QR Qylmystyq kodeksiniń 189-baby 4-bóligi 2-tarmaǵymen is qozǵalǵan edi. Onda «Jańaqorǵan aýdanynyń bilim bólimi» KMM-niń basshysy, bólimniń bas esepshisi jáne 6 mektep esepshisine, 1 bas ekonomistke qatysty qylmystyq is qaraldy.
«Sottalýshylar ózderiniń qyzmet babyn paidalanyp, 2018 jyldyń qańtar-jeltoqsan ailary aralyǵynda bilim bóliminen 6 esepshi men 1 ekonomistiń kómektesýi arqyly jalpy somasy 192097670 teńge memlekettik biýdjet qarajatyn asa iri mólsherde birneshe ret jymqyrǵan. Sottalýshylar bólim basshysy I. men bas esepshi J. bilim bólimi esepshileriniń bankomat kartasyna ai saiyn eńbekaqy tólemi, eńbekke jaramsyzdyq pen issapar shyǵyny erekshelikteri boiynsha artyq jáne zańsyz qarajatty aýdaryp otyrǵan. Ony qolma-qol aqshaǵa ainaldyryp, ózderine alyp kelýdi tapsyrǵan. Osylaisha birlesip qylmys jasaýǵa aldyn-ala kelisimin alǵan. Óz kezeginde J. esepshiler men olardyń jaqyn týystaryna, mektepterdiń basqa da qyzmetkerleriniń banktik kart-shotyna zańsyz aqsha aýdarǵan. Atalǵan qarajat esepshiler arqyly ekinshi deńgeilik bank bankomattary arqyly qolma-qol aqshamen J.-ǵa tabys etilgen. Keiinnnen ol I.-ǵa jetkizilgen», - dep málim etti Jańaqorǵan aýdandyq sotynan.
Sot talqylaýy barysynda memlekettik aiyptaýshy bilim berý júiesinde jumys istemeitin tulǵalardyń esepshotyna zańsyz aqsha aýdarylǵanyn dáleldedi.
Qylmystyq is boiynsha negizgi aiyptalýshylar 9 jáne 8 jylǵa bas bostandyǵynan aiyrylsa, qalǵan 7-i sybailas býhgalterlik qyzmetpen ainalysý quqyǵynan aiyra otyryp, shartty túrde sottaldy.
Eske salsaq, budan buryn Qyzylorda oblysynda azamattardyń 35 mln teńgesin aldap alǵandar ustaldy.
