Foto: "Habar" telearnasy
Ishki ister ministri Marat Ahmetjanov elordadaǵy Kaspi bank bólimshesinde qyzmetkerlerdi kepilge alǵan basqynshymen kelissóz qalai júrgizilgenin aitty, dep habarlaidy Sputnik Qazaqstan saity.
Úkimet kýlýarynda jýrnalister bank qyzmetkerlerin kepilge alǵan kúdiktimen nege ministrdiń ózi kelissóz júrgizgenin surady.
"Ol jerde meniń orynbasarlarym da boldy. Bólimsheniń ishinde kelissóz júrgizgen adamdar boldy. Men ózim bardym, "qyzdy bosat, men qalaiyn" dep edim, biraq ol kónbedi. Bronejiletpen ishke kirgizbedi, sheshýge týra keldi", - dep jaýap berdi Ahmetjanov.
Aitýynsha, basqynshynyń talaptary ártúrli bolǵan.
Qazir bul fakti boiynsha tergeý júrip jatyr. Arnaiy operatsiiaǵa IIM basshysynyń ózi de qatysqandyqtan, odan da jaýap alynýy múmkin.
Sondai-aq ministr kúdiktiniń buǵan deiin urlyq jáne alaiaqtyq boiynsha isti bolǵanyn aitty.
Eske salsaq, 18 maýsymda Astanadaǵy " Kaspi bank" filialyn belgisiz bireý basyp aldy. Tapanshaǵa uqsas zat ustaǵan er adam 7 adamdy kepilge alyp, birneshe talap qoiǵan. Kúdiktimen kelissóz júrgizýge IIM basshysy Marat Ahmetjanovtyń ózi keldi.
Keiin quqyq qorǵaý organdarynyń qyzmetkerleri bólimshege shabýyl jasap, bank qyzmetkerlerin bosatty. Al kúdikti qolǵa tústi.
Prokýratýranyń aqparatynsha, 30 jastaǵy Álihat Muradov 2013 jyldan beri esirtkige táýeldi adamdar esebinde tur. Jambyl oblysynyń týmasy bankten kredit te alǵan. Eki ret qylmystyq is boiynsha kúdikti bolyp tanylǵan.
Bul fakti Qylmystyq kodekstiń 261-baby (Adamdy kepilge alý) boiynsha tergelip jatyr.
