"Qyz alyp qashý" degen jabaiy ǵurypty joiý úshin ár qazaq otbasy ulyna munyń 21-ǵasyrda "adam urlaý" dep atalatyn aýyr qylmys ekenin uqtyrýy kerek. Al qyzyna osyǵan uqsas qandai da bir jaǵdaiǵa ushyrasa, esh qobaljymai, órekpigen topty aldarqatyp dereý úiimen habarlasýyn, sosyn basyna otyz oramal bailap, qyryq tabaldyryqtan attatsa da, adyraspan jaǵyp, jolyna kempirler kóldeneń jatyp alsa da, ondai ortaǵasyrlyq salttyń zań turǵysynan jeke bas statýsyn esh ózgertpeitinin eskerte berýi lázim.
Dál osy máselege qatysty "El ne deidi?" degen komplekstiń postsovettik býynnyń boiynda bolmaýy tiistigin túsindirý qajet. Qyz balaǵa óz erkinen tys qandai da bir alyp qashý oqiǵasynyń ortasynda qalsa, sol úidegi es-aqyly durys úlken adamdarǵa sabyrmen ǵana ynjyq uldarynyń sottalyp ketýi múmkin ekenin aityp, týystarymen jáne zań oryndarymen dereý bailanysqa shyǵýdy talap etip turyp alýyn uǵyndyrý kerek. Jylamai-syqtamai, qasaqana sazarǵan túrmen.
Alyp qashqan jigitten bólek mundai "qoldy bolǵan qalyńdyqtardyń" obalyna qalatyndar - "ózimiz de óstip kelin bop túskenbiz" dep sóileitin, óz tragediiasyn endi jańa qurbannyń boiynan kórgisi kelip janyn jubatýǵa qushtar adamdar. Qurbandar sanyn kóbeite túsetin jáne bir úlken faktor - "esik kórip qoidym, basyma jaýlyq túsip ketti" dep eskishe oilaityn qyz balanyń qorqynyshy. Bul qorqynyshty seiiltýdiń jolyn joǵaryda aittym. "El ne dese, o desin! Odan mahabbatymyz bir mysqal kemimeidi. Júregimizdiń tórindegi, kóńilimizdiń kógindegi juldyzymyzsyń. Óz taǵdyryńa óziń ie táýelsiz tulǵasyń, zaiyrly eldiń azamatysyń" dep ósirý kerek qyz balany.
Ǵalym Boqashtyń feisbýktaǵy jazbasynan
