"قىز الىپ قاشۋ" دەگەن جابايى عۇرىپتى جويۋ ٷشٸن ەر قازاق وتباسى ۇلىنا مۇنىڭ 21-عاسىردا "ادام ۇرلاۋ" دەپ اتالاتىن اۋىر قىلمىس ەكەنٸن ۇقتىرۋى كەرەك. ال قىزىنا وسىعان ۇقساس قانداي دا بٸر جاعدايعا ۇشىراسا, ەش قوبالجىماي, ٶرەكپٸگەن توپتى الدارقاتىپ دەرەۋ ٷيٸمەن حابارلاسۋىن, سوسىن باسىنا وتىز ورامال بايلاپ, قىرىق تابالدىرىقتان اتتاتسا دا, ادىراسپان جاعىپ, جولىنا كەمپٸرلەر كٶلدەنەڭ جاتىپ السا دا, ونداي ورتاعاسىرلىق سالتتىڭ زاڭ تۇرعىسىنان جەكە باس ستاتۋسىن ەش ٶزگەرتپەيتٸنٸن ەسكەرتە بەرۋٸ لەزٸم.
دەل وسى مەسەلەگە قاتىستى "ەل نە دەيدٸ?" دەگەن كومپلەكستٸڭ پوستسوۆەتتٸك بۋىننىڭ بويىندا بولماۋى تيٸستٸگٸن تٷسٸندٸرۋ قاجەت. قىز بالاعا ٶز ەركٸنەن تىس قانداي دا بٸر الىپ قاشۋ وقيعاسىنىڭ ورتاسىندا قالسا, سول ٷيدەگٸ ەس-اقىلى دۇرىس ٷلكەن ادامدارعا سابىرمەن عانا ىنجىق ۇلدارىنىڭ سوتتالىپ كەتۋٸ مٷمكٸن ەكەنٸن ايتىپ, تۋىستارىمەن جەنە زاڭ ورىندارىمەن دەرەۋ بايلانىسقا شىعۋدى تالاپ ەتٸپ تۇرىپ الۋىن ۇعىندىرۋ كەرەك. جىلاماي-سىقتاماي, قاساقانا سازارعان تٷرمەن.
الىپ قاشقان جٸگٸتتەن بٶلەك مۇنداي "قولدى بولعان قالىڭدىقتاردىڭ" وبالىنا قالاتىندار - "ٶزٸمٸز دە ٶستٸپ كەلٸن بوپ تٷسكەنبٸز" دەپ سٶيلەيتٸن, ٶز تراگەديياسىن ەندٸ جاڭا قۇرباننىڭ بويىنان كٶرگٸسٸ كەلٸپ جانىن جۇباتۋعا قۇشتار ادامدار. قۇرباندار سانىن كٶبەيتە تٷسەتٸن جەنە بٸر ٷلكەن فاكتور - "ەسٸك كٶرٸپ قويدىم, باسىما جاۋلىق تٷسٸپ كەتتٸ" دەپ ەسكٸشە ويلايتىن قىز بالانىڭ قورقىنىشى. بۇل قورقىنىشتى سەيٸلتۋدٸڭ جولىن جوعارىدا ايتتىم. "ەل نە دەسە, و دەسٸن! ودان ماحابباتىمىز بٸر مىسقال كەمٸمەيدٸ. جٷرەگٸمٸزدٸڭ تٶرٸندەگٸ, كٶڭٸلٸمٸزدٸڭ كٶگٸندەگٸ جۇلدىزىمىزسىڭ. ٶز تاعدىرىڭا ٶزٸڭ يە تەۋەلسٸز تۇلعاسىڭ, زايىرلى ەلدٸڭ ازاماتىسىڭ" دەپ ٶسٸرۋ كەرەك قىز بالانى.
عالىم بوقاشتىڭ فەيسبۋكتاعى جازباسىنان
