“Qytailar kele jatyr!” degennen zárem qalmady. Óitkeni Astanadaǵy áldebir neke agenttiginiń bastyǵy Tatiana degen hanymnyń “Qytai jobasyna” áielim qatty qyzyǵa ketkeni.
– Qytaidyń men degen millioner 15 jigiti elimizge qazaq qyzdaryn aittyrýǵa keledi eken. Men de baryp... – dep tili kúrmeldi.
– Ói, sen meniń áielim emessiń be? – dep suradym kózderim atyzdai bolyp.
– Bolsam she? Qytailyqtardyń bir jyldyq tabysy 90 myń dollar dep jazypty, al seniń ailyǵyń otyz myń teńge... Kedeilikten kúiip kettim tegi!
– Osydan attap bas, aiaǵyńdy syndyramyn!
– Ketemin!
– Seni kim alady? Baiǵa tigensiń! Eki balamyz bar...
– “Kúieýim joq” dep sendiremin. Eki balam bolsa da, áli qyzdaimyn. Músinim uryp tur. Qytailyq jigitter meni kórgende shetterinen qulaidy!
– Shynymen ketesiń be? Qytaiǵa?
– Iá.
– Kel, qoshtasyp qalaiyq,–dedim. Ol ornynan turdy. Bas salyp moinynan qylǵyndyra bastap edim, “birdeńe aitaiyn, birdeńe!” degen sózin áreń uqtym.
O, atańa nálet qytailyq jigitter! Neleriń bar bizdiń eldegi qyz-qyrqynǵa dvijenie jasap?! O, ońbaǵan agenttik basshysy! Qarap otyryp qatynymnan aiyrylaiyn dep otyrmyn ǵoi!
Áielimniń kózderi baqyraiyp, ólgeli jatyr! Saýsaqtarymdy bosatyp edim, jarty saǵat jóteldi.
Sodan keiin kózderi jasaýrap:
– Shynymen, meni namysy, uiaty joq qyzdar qataryna qosyp otyrsyń ba? –dep surady.
– Iá!
– Ói, jyndy, men ásheiin aldap tiemin de, aqshasyn alyp, qashyp ketemin ǵoi! Nesieden qutylamyz, aqshaly bolyp qalamyz. Kerek edi, maǵan baqa-shaian jegishteriń!
– Qalai sonda?
– “Seni unatyp qaldym, biraq maǵan myń dollar bere turshy, shesheme tastap keteiin. Ol seniń bolashaq eneń ǵoi!” demeimin be? Sodan soń “mańǵyt, aýzyńa sańǵyt” dep...
Oilanyp qaldym da, artynan ile ainydym:
– Qoishy qatyn, qytaisyz da qatyq kóje ishe alamyz! Qytai elshisiniń ózi aityp jatyr, qytai jigitteri qazaq qyzdaryna qumar dep, qaidan bileiin, shynymen ketip qalsań she?
Qatynym qabaǵyma qarady, balalarym sabaǵyna qarady...
Qashanǵa deiin qarar eken qabaǵyma?!
Azamat JUMAShTEGI,
Tekeli qalasy,
Almaty oblysy.
"Jas Alash" gazeti
