Áleýmettik meditsinalyq saqtandyrý qory 9 aida 23,4 mlrd teńge kólemindegi qarjylyq shyǵynnyń aldyn aldy. Qylmystyq ister aiasynda ónim berýshilerge zańsyz tólengen 7,9 mlrd teńgeden astam qarajatty qaitarý jumystary júrgizilip jatyr, dep habarlaidy ult.kz.
Qarjy ministrliginiń málimetinshe, qor qarajatynyń maqsatsyz jumsalýyna jol bermeý úshin baqylaý kúsheitilgen. Jasandy intellekt negizindegi antifrod júiesi zańbuzýshylyq belgilerin tólem jasalǵanǵa deiin anyqtaýǵa múmkindik beredi.
Qazir meditsinalyq uiymdardy qarjylandyrý limitteri ulǵaiyp, aýrýhanalarǵa naqty kórsetilgen meditsinalyq qyzmetter úshin aqy tóleý múmkindigi keńeiip jatyr.
El boiynsha merzimi ótken kreditorlyq bereshegi bar 68 meditsinalyq uiym anyqtalǵan. Olardyń árqaisysyna jergilikti atqarýshy organdardyń qatysýymen qarjylyq saýyqtyrý jospary ázirlendi.
2026 jyldyń sońyna deiin merzimi ótken kreditorlyq bereshekti 17 mlrd teńgeden 10 mlrd teńgege deiin tómendetý josparlanyp otyr.
Qarjy ministrligi aldaǵy kezeńde meditsinalyq kómekti qarjylandyrý júiesin jetildirip, qarajatty patsientterdiń qajettiligine qarai bólýdi kózdeidi. Negizgi maqsat – meditsinalyq kómektiń qoljetimdiligin arttyryp, qajetti emdi ýaqytyly alýǵa múmkindik berý.
