20 aqpanda keshke Ýkrainanyń Poltava oblysynda koronavirýsqa bailanysty Qytaidyń Ýhan qalasynan evakýatsiialanǵan azamattar Novye Sanjary qalasyndaǵy shipajaiǵa avtobýspen jetkizildi. Politsiia joldy jappaq bolǵan turǵyndardy ustap, kedergilerdi alyp, joldy ashty.
Kúndiz munda jergilikti turǵyndar Ýhannan evakýatsiialanǵan azamattardy osynda ornalastyrýǵa qarsy bolyp, narazylyq tanytqan. Turǵyndar narazylyqty basýǵa tyrysqan politsiiamen qaqtyǵysyp qaldy. Birneshe adam ustaldy.
Novye Sanjarydaǵy narazylyq aktsiiasy beisenbi kúni tańerteń bastalǵan. Virýs oshaǵy Ýhan qalasynan evakýatsiialanatyn azamattardy osynda karantinge jatqyzatynyn estigen turǵyndar koronavirýstyń taralýynan qorqyp, olardy qalaǵa ákelýge qarsy bolǵan. Olar joldy kólik ótpeitindei jaýyp, júk kóligin de qoiyp qoiǵan. Keiinnen politsiia joldy arshyp, turǵyndardy kúshpen taratty.
Qytaidan 73 adam: 45 ýkrainalyq, ózge eldiń 27 azamaty evakýatsiialanǵan. Olardyń eshqaisysynan infektsiia belgileri tabylmaǵan. Olar eki apta boiy Novye Sanjarydaǵy shipajaida karantinde bolady. Shipajaidy quqyq qorǵaý organdary kúzetedi.
20 aqpanda osyǵan uqsas aktsiialar Ýkrainanyń ózge aimaǵynda da boldy. Lvov oblysynda turǵyndar Qytaidan evakýatsiialanǵan azamattar jatqyzylýy múmkin delingen áskeri aýrýhanaǵa aparatyn joldy kólik dońǵalaǵynyń tystarymen japqan.
Bilik ókilderi men qoǵam qairatkerleri narazylyq aktsiiasyn teris baǵalady. Shirkeý qaýymdastyǵy ókilderi turǵyndardy qaiyrymdy bolýǵa shaqyrdy. Ýkraina prezidenti Vladimir Zelenskii Facebook-taǵy paraqshasynda "bul jaqsy minez emes" dep narazylardyń áreketin aiyptady. Ýkraina úkimetiniń jetekshisi Aleksei Goncharýk beisenbi kúni keshke Novye Sanjaryǵa ushyp keldi.
- Ýkrainada koronavirýsty juqtyrý oqiǵasy tirkelmegen;
- Sońǵy derek boiynsha, Qytaida koronavirýs juqtyrǵandar 74 myńnan, qaza bolǵandar 2000-nan asqan. Qytai biliginiń dereginshe 12 myń adam koronavirýsten aiyqqan.
