Qytaidaǵy stýdentterdi alyp kelýge ushaq daiyn. Bul týraly QR Premer-Ministriniń orynbasary Berdibek Saparbaev málim etti, – dep habarlaidy QazAqparat.
«Qazirgi tańda qandai sharalar qoldanylǵany jóninde aittym. Keshe biz buqaralyq aqparat quraldaryna qolǵa alynǵan sharalar týraly habarladyq. Qazir biz Qytai Halyq Respýblikasynyń Syrtqy ister ministrligimen jumys istep jatyrmyz. Sondaǵy birinshi kezekte bizdiń stýdentterdi alyp kelý jónindegi sharalar pysyqtaldy. Ekinshiden, sondaǵy týristerdi jetkizý. Týrister 680 bolǵan, olardyń jartysy elge oraldy. Bizdiń esebimiz boiynsha búgin nemese erteń tolyǵymen elge kelýi kerek», - dedi B. Saparbaev Parlament Májilisinde tilshiler saýalyna jaýap bere otyryp.
Sonymen qatar ol Qytaidaǵy stýdentter máselesine de toqtaldy.
«Elge kelemiz degen stýdentterge ushaq daiyndap qoidyq. Ózderińiz bilesizder, eki eldiń arasynda tiisti kelisimsharttar bar. Soǵan sáikes jumys isteýimiz kerek», - dedi Úkimet basshysynyń orynbasary.
Sonymen qatar, B. Saparbaev Úkimet basshysy qosymsha quraldar, maskalar, taǵy da kerek attar alý úshin qaýlyǵa qol qoiǵanyn atap ótti.
«Oǵan qosymsha 1,5 mlrd teńge bólingen. Onyń ústine, ózimizdiń qorymyz da bar, jergilikti jerlerde beriletin kómek bar. Iaǵni, kómekti nemese meditsinalyq qoldaýdy qajet etetin azamattar bolsa, oǵan bizdiń qarjymyz da, múmkindikimiz de bar», - dedi Premer-Ministrdiń orynbasary.
Budan buryn habarlanǵandai, QR Bilim jáne ǵylym vitse-ministri Miras Dáýlenov Qytaidaǵy joǵary oqý oryndarynda oqyp júrgen Qazaqstannyń stýdentterine demalys merzimin uzartý sharalary pysyqtalyp jatqanyn aitty. Qytaidyń Ýhan qalasynda 400 stýdent oqyp júr. Sonyń ishinde 98-i sol qalada, iaǵni olar oqý ornynyń kampýsynda.
