Qytaidyń Ýhan qalasynda koronavirýstyń órshýine bailanysty keiinge shegerilgen bokstan Aziia aimaqtyq irikteý týrniriniń merzimi de, ótetin orny da ózgeretini málimdeldi, - dep habarlaidy. Olympic.kz.
«Halyqaralyq Olimpiada komitetiniń boks boiynsha jumys toby men Qytaidyń Olimpiadalyq komiteti Ýhandaǵy koronavirýs infektsiiasynyń taralýyn jiti qadaǵalaýda. Sportshylar men resmi tulǵalardyń qaýipsizdigin qamtamasyz etý maqsatynda 3-14 aqpan aralyǵyna josparlanǵan 2020 jylǵy Tokio Olimpiadasyna Aziia/Tynyq muhity elderiniń boksshylaryn irikteýdi keiinge qaldyrý sheshimi qabyldanǵan bolatyn. Irikteý týrniri ótkiziletin jańa merzim – 3-11 naýryz. Qazirgi kezde jarysty ótkizetin oryn qarastyrylýda. Bir anyǵy, týrnir Qytaida uiymdastyrylmaidy. Jumys toby týrnirdi qabyldaityn memleket pen qalany anyqtaǵan kezde barlyq Ulttyq Olimpiadalyq komitetter, ulttyq federatsiialar men resmi tulǵalar habardar etiledi», - delingen HOK-tyń resmi hatynda.
Osylaisha, bokstan Tokio Olimpiadasyna alǵashqy irikteý týrniri 20-29 aqpan aralyǵynda Afrikanyń batysyndaǵy Senegal elinde ótedi. Sebebi Ýhannan keiingi kvalifikatsiialyq jarys dál osy elde ótetini josparlanǵan bolatyn.
