Búgin, 15 jeltoqsan kúni, esirtki satty degen aiypppen Qytaida ólim jazasyna kesilgen Qazaqstan azamaty Úrimjiden elge jiberildi, dep jazdy QR SIM baspasóz qyzmetiniń jetekshisi Ánýar Jainaqov Feisbýktegi paraqshasynda.
Sotty azamatty Qazaqstanǵa berý protsesin Qazaqstannyń Qytaidaǵy Elshiligi, QR Bas prokýratýrasy jáne Qytai Ádilet ministrligi uiymdastyrdy.
Almaty oblysynda 1989 jyly týǵan azamatty qytailyq quqyq qorǵaý organdary Gýandýn provintsiiasynyń Gýanchjoý qalasynda 2009 jyly esirtki tasymaldady degen aiyppen ustaǵan bolatyn. Ol ólim jazasyna kesilip, úkimdi oryndaý merzimi 2 jylǵa shegerilgen, al 2011 jyly úkim ómir boiy bas bostandyǵynan aiyrý jazasymen aýystyryldy.
Qazaqstandyq diplomattar men QR Bas prokýratýrasynyń qyzmetkerleri sottalǵan azamattardy Qazaqstanǵa qaitaryp, jazasyn elimizde óteýi boiynsha Qytai tarapymen kóptegen jumystar júrgizdi.
Aǵymdaǵy jyly Qytaidan Qazaqstanǵa taǵy da 4 azamat, al 2015 jylǵy tamyzdan beri 15 sottalǵan azamat qaitaryldy.
Qazaqstan Respýblikasy Syrtqy ister ministrligi men Bas prokýratýrasy osy qyzmetti basqa elderde de júrgizip keledi.
