Qytaida koronavirýsty juqtyrǵandar sany aldyńǵy kúnmen salystyrǵanda 10 esege kóbeiip, sońǵy derek boiynsha 15 myńǵa jýyq adamnan virýs tabylǵan. Bul aqparatty Qytai biligi habarlady. Sońǵy táýlikte virýstan 242 adam kóz jumǵan.
Dúniejúzilik densaýlyq saqtaý uiymy sársenbi kúni "koronavirýstyń taralýy báseńdedi" dep málimdegen edi. 10-11 aqpanda Qytai biligi eki myń virýs juqtyrǵanyn habarlaǵan.
Qytaidyń densaýlyq saqtaý jónindegi ulttyq komissiiasy "aýrýdy anyqtaý metodikasy ózgergendikten virýsty juqtyrǵandar sany kúrt kóbeidi" dedi. Dárigerler "endigári kompiýterlik tomografiia derekterine súiene otyryp, aýrýdy erterek anyqtaimyz" dep otyr.
Qazir Qytaidyń ózinde virýsty juqtyrǵandar sany 60 myńǵa jetti, úsh myńnan astam adam kóz jumdy. Shamamen alty myńy aýrýdan aiyqty.
12 aqpanda Londonda birinshi koronavirýsty juqtyrý oqiǵasy tirkeldi. BBC aqparat agenttiginiń jazýynsha, naýqas birneshe kún buryn Qytaidan kelgen. Jalpy Ulybritaniiada osymen koronavirýs juqtyrǵan toǵyzynshy adam tirkeldi.
Virýstyń taralý aýqymy keńeiip barady. Álemniń 50 memleketinde koronavirýs tabylǵan.
Dúniejúzilik densaýlyq saqtaý uiymynyń bas direktory Tedros Gebreiesýs "epidemiianyń aiaqtalatyny jaily boljam jasaý áli qiyn" deidi. DDSU ǵalymdary qazirgi kezde tórt túrli ekpemen jumys istep jatqanyn habarlady.
Koronavirýstyń jappai taralýyna bailanysty birqatar halyqaralyq sharalar keiinge qaldy. Halyqaralyq kólik federatsiiasy Qytaidaǵy "Formýla-1" jarysyn keiinge qaldyrý týraly sheshim qabyldady. Barselonadaǵy Mobile World Congress kórmesiniń uiymdastyrýshylary koronavirýsqa bailanysty kórme ótpeitinin málimdedi.
Resei Qiyr Shyǵystaǵy Qytaimen shekarasyn jaýyp, kórshi elge qatynaityn avtobýstardy toqtatty. 14 aqpannan bastap Resei men Qytai arasyndaǵy charterlik reister toqtaidy.
