Qytaidyń Sýdjoý qalasynda 19 jastaǵy qazaqstandyq stýdent qyz 14-inshi qabattan qulap, qaza boldy, dep habarlaidy QazAqparat tilshisi.
Qaiǵyly jaǵdaidy QR SIM baspasóz qyzmetiniń basshysy Ánýar Jainaqov rastady.
«Qazir bul derek boiynsha Qytai politsiiasy tergeý júrgizip jatyr. Pákistannyń eki azamaty ustaldy. Keiinirek olardyń bireýi qolhatpen bosatyldy. Qaiǵyly jaǵdai týraly Shanhai qalasyndaǵy Qazaqstan Konsýldyǵy anyqtap bildi. Olar qyzdyń týǵan-týystaryna habar berdi. Konsýldyq qyzmetkerleri qyzdyń ata-anasyna Qytaidan qorǵaýshy tabýǵa qol ushyn berdi», - dedi Ánýar Jainaqov.
Oqiǵa 1 jeltoqsan kúni Shanhai qalasynan 100 shaqyrym jerde ornalasqan Sýdjoý qalasynda boldy.
1999 jyly Almaty oblysynda týǵan stýdent qyz Sýdjoý qalasyndaǵy ýniversitetterdiń birinde 2-kýrsta oqyp júrgen.
Aldyn ala málimet boiynsha, 1 jeltoqsan kúni Pákistan azamaty qazaqstandyq boijetken men onyń qurbysyn óz týǵan kúnin atap ótýge shaqyrǵan. Páterde QR-dyń eki azamatshasynan bólek, taǵy bir pákistandyq bolǵan. Er adamdar ishimdik iship, qyzdarǵa qol jumsai bastaǵan soń, olardyń biri páterdiń bir bólmesine qashyp kirip, esikti ishten jaýyp alǵan.
Birshama ýaqyttan soń bólmeden shyqqan qyz qurbysynyń 14-inshi qabattan qulap ketkenin kórgen.
QR SIM baspasóz qyzmeti basshysynyń aitýynsha, ázirge qyzdyń ózi sekirip ketkeni, bolmasa bireýdiń iterip jibergeni naqtylanǵan joq. Degenmen, sot-meditsinalyq saraptamanyń nátijesinde qyzdyń biiktikten qulaý saldarynan kóz jumǵany rastaldy.
Saraptama sondai-aq onyń denesinde zorlyq-zombylyq belgileri bolmaǵanyn kórsetken.
«Shanhaidaǵy Qazaqstan Konsýldyǵy men QHR-daǵy Qazaqstan elshiligi bul máseleni óziniń tikelei baqylaýyna aldy. Marqumnyń denesi 25 jeltoqsanda Qazaqstanǵa jetkizildi. Oǵan QR elshiligi barynsha kómek kórsetti», - dep atap ótti Á.Jainaqov.
Resmi ókildiń habarlaýynsha, mert bolǵan qyzdyń qurbysy Sýdjoýdaǵy oqýyn jalǵastyrýda.
