Respýblika boiynsha 2019 jyldyń 18 qańtarynda saǵat 9:00-de oqýdyń aqyly bólimine túsýshiler úshin Ulttyq biryńǵai testileý bastaldy. 18-20 qańtar aralyǵynda 35 838 talapker synaqqa qatysady. Onyń ishinde 61-i bilimin aǵylshyn tilinde synaidy. UBT-ny shet tilinde tapsyrýshylar sanynyń artýyna «Halyqaralyq baǵdarlamalar ortalyǵy» AQ qyzyǵýshylyq tanytty. Osyǵan orai, testilenýshilerge yntalandyrý retinde joǵary ball jinaǵan oqýshyny sheteldik JOO-ǵa grantqa túsirmekshi.
QR BǴM «Halyqaralyq baǵdarlamalar ortalyǵy» AQ basshysy Janbolat Meldeshov testi aǵylshyn tilinde úzdik tapsyrǵan talapkerge grant bólýge daiyn ekendigin aityp, birqatar sheteldik seriktes JOO-lardy belgiledi.
2019 jyldan bastap qazaqstandyq mektepterdiń túlekteri UBT-ny tórt ret tapsyrýǵa múmkindik aldy. Bul bastamanyń maqsaty - mektep bitirýshilerge JOO-ǵa túsý múmkindigin arttyrý. Oqýshylar UBT-ny qazaq, orys jáne aǵylshyn tilderinde tapsyra alady. Biyl 61 talapker testi aǵylshyn tilinde tapsyrýǵa bel býdy (salystyrmaly túrde: jazǵy UBT – 2018 kezinde, tek, 25 oqýshy aǵylshyn tilinde tapsyrdy).
«Jalpy, sheteldik joǵary oqý oryndarynda bilim alýǵa múmkindik óte kóp. Biyl sheteldik JOO-lar bizdiń azamattarǵa 40 000 grant bólýge daiyn. Bul – ár talapkerdiń tegin bilim alýǵa múmkindigi bar degen sóz. Mektep túlekteri UBT sertifikatymen qazaqstandyq JOO-larǵa ǵana emes, sheteldik oqý oryndaryna da túse alady. Mysaly, Túrkiia joǵary oqý oryndaryna bizdiń sertifikatymyzben túse alady. Ol úshin aǵylshyn jáne túrik tilderin bilýi kerek», - deidi J. Meldeshov.
Sońǵy jyldary aǵylshyn tilinde bilim berý qarqyndy damyp keledi. Keibir qazaqstandyq mektepterde aǵylshyn tilinde pánder engizilgen. Aǵylshyn tilinde test tapsyrýdyń basty maqsaty – sheteldik JOO-ǵa túsýge degen niet. Bul suraq boiynsha talapkerlerge «Halyqaralyq baǵdarlamalar ortalyǵy» kómektesýge daiyn.
