8 qazanda tańerteń Kerchtegi Qyrym kópirinde jarylys boldy. Bul jóninde Kerch.fm portaly habarlady. Jergilikti turǵyndar oqiǵa ornynan foto, video jariialady.
Kerch.fm saitynyń jazýynsha, joldaǵy júk poiyzdary órtengen. Joldyń bir bóligi qulaǵan.
"Qyrym temir joly" federaldyq kásiporny "júk poiyzynyń sońyndaǵy otyn tsisternasy órtengenin", sebebi anyqtalyp jatqanyn aittty.
Túbektegi Resei biliginiń aitýynsha, kópirde jol qozǵalysy toqtaǵan, onyń arkalary búlinbegen. Kerch túbeginde kemeler júrip jatyr, kólikterge paromdardan ótkel daiyndalyp jatyr.
Anneksiialanǵan Qyrym basshysynyń keńesshisi Oleg Kriýchkov órt sóndirilip jatqanyn, kópirde júrgizýshilerge arnalǵan tamaqtaný pýnkteri men jylyný oryndary ashylǵanyn aitty. Qolda bar málimet boiynsha, zardap shekkender joq.
Resei tergeý komiteti "Qyrym kópirindegi oqiǵaǵa bailanysty" qylmystyq is qozǵalǵanyn málimdedi. Komitet ókilderi qandai bap boiynsha is qozǵalǵanyn naqtylamady, biraq "tergeýshiler qylmysqa qatysy bar azamattardy anyqtap jatyr" dedi.
Aita keteiik, Pýtin 2014 jyly Qyrym túbegin anneksiialap alǵannan keiin birden Qyrym kópirin salýdy tapsyrǵan. Kópirdiń ashylýy 2018 jyly mamyrda ótti. Ashylý rásimine Resei prezidenti qatysty, sharany Reseidiń memlekettik arnalary tikelei efirde kórsetti.
"Vedomosti" gazetiniń jazýynsha, 2017 jyly aqpanda jobanyń jalpy quny 300 mlrd rýblden asýy tiis bolǵan.
Qazir Qyrym kópirin Resei Ýkraina ońtústigindegi armiiasyn jabdyqtarmen qamtamasyz etý úshin paidalanyp jatyr.
