«Bir jol bar – alys, alys ta bolsa jaqyn, bir jol bar – jaqyn, jaqyn da bolsa alys», degendei, Aqsýat pen Zaisanǵa bet alǵan jolaýshy buryn qashyq bolǵanyna qaramastan, Qalbataý arqyly júrgendi jón sanaityn. Óitkeni, Qaraǵandy men Almaty oblysy jaqtan keletin jolaýshylar úshin «Aiagóz – Boǵas» baǵyty tóte bolsa-daǵy sanattan shyǵyp qalǵan jol sipatynda edi. Al táýekel eter jan bolsa, ábden áýre-sarsańǵa túsip, it-yrǵyljyńmen jeter edi. «Samarqannyń sar joly, Bulanaidyń tar joly» demekshi, jol taýqymetin tartyp, zapy bolǵan turǵyndardyń talap-tilegi eskerildi. Byltyr bergen ýáde biyl oryndaldy. Oblys ákimi osyǵan deiin shuryq tesik, keteýi ketken jolmen ózi júrip ótip, ony jóndeýge tiisti mekemelerge tapsyrma júktegen edi. Endi jaz boiy kúrdeli jóndeý júrgizilgen jolmen taǵy da júrip ótip, qurylys sapasyn tekserdi.
«Aiagóz – Boǵas» trassasy – qyryq jyl jóndeý kórmegen, tozyǵy jetken jol toraby. Óńir úshin óte mańyzdy joldyń jóndelýi arqyly jolaýshylardyń 200-den astam shaqyrymdy únemdeýine múmkindik týdy. Biyl bul joldyń 78 shaqyrymy jóndeýden ótti. Taqtaidai jolmen tosylmai tike tartqan turǵyndar dán riza. «Jol aqysy – júrý» deitin elge keregi de osy ǵoi.
– Buryn Aqshi men Aiagóz arasynda bir saǵattan artyq júrsek, qazir jarty saǵatta jetemiz. Ýaqyt únemdeletin boldy, kóligimiz de buzyla bermeidi. Aýyldyń máselesine kóńil bólip, qamqorlyq kórsetken Elbasymyzǵa, oblys basshysyna eldiń rizashylyǵy sheksiz, – dedi Aiagóz aýdanyndaǵy Aqshi aýylynyń turǵyny Tursynǵali Oralbaev.
Oblys basshysy atqarylǵan jumysqa oń baǵasyn berdi. Bul baǵyttaǵy jol qurylysynyń qalǵan bóligi kelesi jyly jalǵaspaq. Alǵys aitqan aǵaiyn memlekettiń qoldaýyn sezinip, kóńilderi tasyǵannan taǵy bir joldy jóndep berýdi surady. Bul – aýdan aýmaǵyndaǵy «Aiagóz – Shubartaý» tas joly.
– Jóndeý jumystary jalǵasyn tabady. Al Shubartaýǵa deiingi joldyń jaǵdaiyn qarastyraiyq. Tiisti oryndar barlyq jumys kólemin eseptep, saraptaidy. Sodan keiin bir sheshimge kelemiz, – dedi D.Ahmetov.
Jalpy, Shyǵys óńiri – joldardyń uzaqtyǵymen erekshelenetin aimaq. Oblystyq jolaýshylar kóligi jáne avtokólik joldary basqarmasynyń basshysy Berik Beisekenovtiń aitýynsha, aǵymdaǵy jyly oblystyq mańyzdaǵy joldardy ortasha jóndeýge biýdjetten 5,3 milliard teńge qarastyrylǵan. Onyń ishinde 3,5 milliard teńge jol jóndeýge, 1,77 milliard teńge joldardy kútip, ustaýǵa baǵyttalǵan. Biyl jalpy qashyqtyǵy 221 shaqyrym bolatyn 16 jol ýchaskesinde ortasha jóndeý jumystary júrgizilýde.
– Biyl jyly Sibe kólderine, Alakólge, Óskemennen «Nurtaý» shańǵy bazasyna baratyn joldar men Kúrshim – Qaljyr, Óskemen – Tarǵyn – Samar, Borodýliha – Shemonaiha jáne Serebriansk qalasyna kireberis avtojoldar qalpyna keltirildi. Bul óńirdiń týristik áleýetin kóterý maqsatynda da jasalyp otyr, – dedi basqarma basshysy.
Al «QazAvtojol» ulttyq kompaniiasy oblystyq filialynyń direktory Serik Aqtanov oblystaǵy respýblikalyq dárejedegi joldardy jóndeýge aǵymdaǵy jyly 5 milliard teńge bólingenin aitady. Bul qarajattyń 76,5 million teńgesi joldardy qaita qurýǵa, 1 milliard 440 million teńgesi kúrdeli jóndeýge baǵyttalǵan. Qalǵan qarjy ortasha jóndeý men jol kútimine jumsalýda. Oblys ákimdiginiń keńeitilgen májilisinde óńir basshysy aldaǵy ýaqytta «Óskemen – Semei» joly men Osinov asýyndaǵy ainalma jolǵa kóńil bólýdi júktedi. Oblys ákiminiń aitýynsha, keler jyly «Qalbataý – Óskemen» jolyna jáne «Aqsýat – Aiagóz» jolynyń 69 shaqyrymyna jóndeý júrgiziledi.
– Joldy jóndeýde qiyrshyq tas paidalanylatyn mastikaly asfaltty keń qoldaný kerek. Eýropada jol tósenishiniń osy túri kóp qoldanysqa ie. Baǵasy qymbat bolsa da, sapasy áldeqaida joǵary, – dedi jol qurylysy operatorlaryna D.Ahmetov.
Dýman ANASh,
«Egemen Qazaqstan»
Shyǵys Qazaqstan oblysy
.jpeg)