Qyrǵyzstannyń Osh oblysynda 7 jasar qyzdy zorlady degen kúdikpen 26 jastaǵy jigit ustaldy.
Bul týraly Osh oblysynyń ishki ister basqarmasy habarlady.
Resmi derek boiynsha, 9 sáýirde keshki segiz shamasynda Kara-Sýý aýdanyndaǵy Kairagach aýylynda jeti jasar N.A. esimdi qyzdy belgisiz bireý zorlaǵan. Qyz aýyr jaǵdaida Osh oblystyq aýrýhanasyna jetkizilgen.
Osh oblystyq ishki ister basqarmasynyń baspasóz hatshysy Jenish Ashirbaevtyń aitýynsha, kúdikti sol mańda týystarynyń úiinde turyp jatqan.
"Kúdikti atalǵan aýyr qylmysqa barǵanyn tolyq moiyndady. Qylmysqa qatysy bar zattar aiǵaq retinde tárkilendi. Qazir kúdikti qamaýda otyr" dedi Ashirbaev.
Aldyn ala málimet boiynsha, ata-anasy Reseide jumys istep jatqandyqtan, kishkene qyz ájesiniń qolynda bolǵan.
Qyrǵyzstan qylmystyq kodeksi boiynsha, kámeletke tolmaǵandardy zorlaǵandar 15-20 jylǵa deiin bostandyǵynan aiyrý jazasyna kesiledi.
Qyrǵyzstan bas prokýratýrasynyń 2020 jylǵy málimeti boiynsha, elde kámeletke tolmaǵandarǵa qatysty 1101 qylmys tirkelgen, sonyń ishinde 150 is jynystyq sipatta bolǵan.
Kámeletke tolmaǵandarǵa qylmystyq zorlyq jasady degen kúdikpen 57 adam qamalǵan, olardyń qanshasyna úkim shyqqany týraly málimet joq.
