قىرعىزستاننىڭ وش وبلىسىندا 7 جاسار قىزدى زورلادى دەگەن كٷدٸكپەن 26 جاستاعى جٸگٸت ۇستالدى.
بۇل تۋرالى وش وبلىسىنىڭ ٸشكٸ ٸستەر باسقارماسى حابارلادى.
رەسمي دەرەك بويىنشا, 9 سەۋٸردە كەشكٸ سەگٸز شاماسىندا كارا-سۋۋ اۋدانىنداعى كايراگاچ اۋىلىندا جەتٸ جاسار ن.ا. ەسٸمدٸ قىزدى بەلگٸسٸز بٸرەۋ زورلاعان. قىز اۋىر جاعدايدا وش وبلىستىق اۋرۋحاناسىنا جەتكٸزٸلگەن.
وش وبلىستىق ٸشكٸ ٸستەر باسقارماسىنىڭ باسپاسٶز حاتشىسى جەنيش اشيرباەۆتىڭ ايتۋىنشا, كٷدٸكتٸ سول ماڭدا تۋىستارىنىڭ ٷيٸندە تۇرىپ جاتقان.
"كٷدٸكتٸ اتالعان اۋىر قىلمىسقا بارعانىن تولىق مويىندادى. قىلمىسقا قاتىسى بار زاتتار ايعاق رەتٸندە تەركٸلەندٸ. قازٸر كٷدٸكتٸ قاماۋدا وتىر" دەدٸ اشيرباەۆ.
الدىن الا مەلٸمەت بويىنشا, اتا-اناسى رەسەيدە جۇمىس ٸستەپ جاتقاندىقتان, كٸشكەنە قىز ەجەسٸنٸڭ قولىندا بولعان.
قىرعىزستان قىلمىستىق كودەكسٸ بويىنشا, كەمەلەتكە تولماعانداردى زورلاعاندار 15-20 جىلعا دەيٸن بوستاندىعىنان ايىرۋ جازاسىنا كەسٸلەدٸ.
قىرعىزستان باس پروكۋراتۋراسىنىڭ 2020 جىلعى مەلٸمەتٸ بويىنشا, ەلدە كەمەلەتكە تولماعاندارعا قاتىستى 1101 قىلمىس تٸركەلگەن, سونىڭ ٸشٸندە 150 ٸس جىنىستىق سيپاتتا بولعان.
كەمەلەتكە تولماعاندارعا قىلمىستىق زورلىق جاسادى دەگەن كٷدٸكپەن 57 ادام قامالعان, ولاردىڭ قانشاسىنا ٷكٸم شىققانى تۋرالى مەلٸمەت جوق.
