6 jeltoqsanda Bishkektegi Sverdlov aýdandyq soty Qyrǵyzstannyń burynǵy premer-ministri Sapar Isakovty 15 jylǵa bas bostandyǵynan aiyrdy.
Ol Bishkektegi jylý elektr stantsiiasy (JES) jóndeý kezinde jemqorlyq jasady dep aiyptalǵan.
Bul is boiynsha Isakovtan bólek taǵy 8 adam jaýapqa tartyldy. Eks-premer Jantoro Satybaldiev 7,5 jylǵa; energetika ministriniń burynǵy orynbasary Aibek Qaliev 15 jylǵa; «Elektr stantsiiasy» kompaniiasynyń burynǵy direktory Salaidin Avazov 11 jyl úsh aiǵa qamaldy. Barlyǵynyń dúnie múlki tárkilendi.
«Elektr stantsiiasy» kompaniiasy basshysynyń orynbasary bolǵan Joldoshbek Nazarov pen Bishkek JES-in jóndeý tobynyń eks-basshysy Temirlan Brimkýlov 2,5 jylǵa sottaldy. Olar bul jazany tergeý izoliatorynda ótegendikten qamaýdan bosady.
Burynǵy qarjy ministri Olga Lavrova men eks-energetika ministri Osmonbek Artykbaevqa aiyppul salyndy.
Isakov pen Satybaldiev sot sheshimimen kelispeidi. Olar apelliatsiialyq shaǵym túsirmek.
Jaýapqa tartylǵandardyń bári Qytai kompaniiasymen kelisim jasaǵan kezde memleketke 111 million dollar shyǵyn ákeldi dep aiyptalǵan.
Sapar Isakov Qyrǵyzstan úkimetin Almazbek Atambaevtyń prezidenttigi tusynda, 2017-2018 jyldary basqarǵan. Oǵan deiin prezident ákimshiliginiń basshysy, basshysynyń orynbasary qyzmetin atqarǵan. Isakov – Atambaevpen «jaqyn qarym-qatynastaǵy» adamdardyń biri bolǵan. Áskeri prokýratýra jemqorlyq isine burynǵy prezident Almazbek Atambaevty da aiyptaidy.
Bishkek jylý elektr stantsiiasynda jóndeý aiaqtalǵan soń bir ai ótpei, 2018 jyly qańtarynda aqaý shyǵyp, Bishkek qalasynyń jartysy jylýsyz qalǵan edi. Osy oqiǵadan keiin tergeý bastalǵan.
