23 qazan kúni Qyrǵyzstanda 556 adamnyń koronavirýs juqtyrǵany anyqtalǵan. Virýs juqtyrǵany rastalǵandar sany 55 144-ke jetti. Bul týraly koronavirýspen kúres jónindegi respýblikalyq shtab habarlady.
Aimaq boiynsha, kósh basynda 149 naýqaspen Bishkek qalasy tur. Odan keiingi oryndarda – Batken (86), Djalal-Abad (83) jáne Osh (75) oblystary.
20 qazan kúni elde 384 Covid naýqasy tirkelse, 21 qazannan beri táýlik ishinde anyqtalǵan koronavirýs naýqastary turaqty túrde 500-den asyp keledi. Ótken táýlikte koronavirýstan taǵy tórt adamnyń qaitys bolǵany anyqtaldy.
Qyrǵyzstanda Qazaqstandaǵydai jaz ailarynda Covid indeti órshi túsip, PTR testi teris nátije kórsetken, biraq aýrý belgileri boiynsha koronavirýsqa uqsaityn pnevmoniia aýrýyna shaldyǵý kúrt kóbeidi. Sóitip qyrǵyz biligi 17 shildeden bastap koronavirýs pnevmoniiasyn Covid jónindegi ulttyq statistikaǵa qosa bastady.
Eki derekti qosqannan keiin alǵashqy kúnderi táýlik ishinde tirkelgen naýqas sany myńnan asyp júrdi. Keiin naýqas sany birtindep azaiyp, qyrkúiek aiynda táýliktik kórsetkish júzden tómendedi. 6 qyrkúiek kúni elde bar bolǵany 55 naýqas anyqtaldy, al 10-20 qyrkúiek aralyǵyndaǵy on kúnniń ishinde Covid ólimi múldem tirkelmedi.
Qyrkúiektiń sońyna qarai virýs juqtyrǵandar sany qaitadan arta tústi. Aýrýdyń qaita órshýi eldegi parlament sailaýymen jáne odan keiingi saiasi tolqýlarmen tuspa-tus keldi.
