23 قازان كٷنٸ قىرعىزستاندا 556 ادامنىڭ كوروناۆيرۋس جۇقتىرعانى انىقتالعان. ۆيرۋس جۇقتىرعانى راستالعاندار سانى 55 144-كە جەتتٸ. بۇل تۋرالى كوروناۆيرۋسپەن كٷرەس جٶنٸندەگٸ رەسپۋبليكالىق شتاب حابارلادى.
ايماق بويىنشا, كٶش باسىندا 149 ناۋقاسپەن بٸشكەك قالاسى تۇر. ودان كەيٸنگٸ ورىنداردا – باتكەن (86), دجالال-اباد (83) جەنە وش (75) وبلىستارى.
20 قازان كٷنٸ ەلدە 384 Covid ناۋقاسى تٸركەلسە, 21 قازاننان بەرٸ تەۋلٸك ٸشٸندە انىقتالعان كوروناۆيرۋس ناۋقاستارى تۇراقتى تٷردە 500-دەن اسىپ كەلەدٸ. ٶتكەن تەۋلٸكتە كوروناۆيرۋستان تاعى تٶرت ادامنىڭ قايتىس بولعانى انىقتالدى.
قىرعىزستاندا قازاقستانداعىداي جاز ايلارىندا Covid ٸندەتٸ ٶرشي تٷسٸپ, پتر تەستٸ تەرٸس نەتيجە كٶرسەتكەن, بٸراق اۋرۋ بەلگٸلەرٸ بويىنشا كوروناۆيرۋسقا ۇقسايتىن پنەۆمونييا اۋرۋىنا شالدىعۋ كٷرت كٶبەيدٸ. سٶيتٸپ قىرعىز بيلٸگٸ 17 شٸلدەدەن باستاپ كوروناۆيرۋس پنەۆمونيياسىن Covid جٶنٸندەگٸ ۇلتتىق ستاتيستيكاعا قوسا باستادى.
ەكٸ دەرەكتٸ قوسقاننان كەيٸن العاشقى كٷندەرٸ تەۋلٸك ٸشٸندە تٸركەلگەن ناۋقاس سانى مىڭنان اسىپ جٷردٸ. كەيٸن ناۋقاس سانى بٸرتٸندەپ ازايىپ, قىركٷيەك ايىندا تەۋلٸكتٸك كٶرسەتكٸش جٷزدەن تٶمەندەدٸ. 6 قىركٷيەك كٷنٸ ەلدە بار بولعانى 55 ناۋقاس انىقتالدى, ال 10-20 قىركٷيەك ارالىعىنداعى ون كٷننٸڭ ٸشٸندە Covid ٶلٸمٸ مٷلدەم تٸركەلمەدٸ.
قىركٷيەكتٸڭ سوڭىنا قاراي ۆيرۋس جۇقتىرعاندار سانى قايتادان ارتا تٷستٸ. اۋرۋدىڭ قايتا ٶرشۋٸ ەلدەگٸ پارلامەنت سايلاۋىمەن جەنە ودان كەيٸنگٸ ساياسي تولقۋلارمەن تۇسپا-تۇس كەلدٸ.
