16 qazanda Qyrǵyzstan parlamenti eldegi prezidenttik biliktiń jańa sailanǵan premer-ministr Sadyr Japarovqa ótkenin maquldady.
Elde parlament sailaýynyń nátijesine qarsy narazylyq sharasy kúsheigen soń 15 qazanda Sooronbai Jeenbekov prezidenttikten ketetinin jariialaǵan. 16 qazanda parlament Jeenbekovtiń ostavkasyn qabyldady.
Juma kúngi otyrysta depýtattar Bishkektegi tótenshe jaǵdaidy da alyp tastady. Jeenbekov Bishkekte narazylyq sharasy kúsheigen tusta qalada tótenshe jaǵdai jariialaǵan edi.
Adam urlady dep sottalǵan eks-depýtat Japarov 6 qazandaǵy narazylyq kezinde jaqtastarynyń kómegimen túrmeden bosatylǵan. 14 qazanda depýtattar ony eldiń premer-ministri etip bekitti.
"Bilik aýysý protsesi beibit túrde ótti" dedi Japarov 16 qazandaǵy parlament jiynynda.
Qyrǵyzstan Konstitýtsiiasy boiynsha, eger el prezidenti qyzmetinen merziminen buryn ketse, jańa prezident sailanǵansha onyń mindetin Jogorký keńesh tóraǵasy atqarady. Eger parlament spikeri prezident mindetin atqara almasa, bul mindet premer-ministrge kóshedi.
Parlament spikeri Kanatbek Isaev 15 qazanda prezident mindetin atqarýdan bas tartty. Ol prezident sailaýyna keler jyldyń 10 qańtaryna deiin ótkizýdi, parlamentke ótý mejesin 7 paiyzdan 5 paiyzǵa azaitýdy usyndy.
Al Ortalyq sailaý komissiiasynyń tóraiymy Nurjan Shaildabekova sailaý 17 qańtarǵa josparlanǵanyn aitty.
- Jeenbekov – keiingi 15 jylda Qyrǵyzstanda bilikten ketýge májbúr bolǵan úshinshi prezident. Buǵan deiin Asqar Aqaev pen Qurmanbek Bakiev eldegi revoliýtsiia nátijesine bilikten ketip, elden qashqan.
- Qyrǵyzstanda 4 qazanda parlament sailaýynda Jeenbekovke jaqyn úsh partiia jáne bir oppozitsiialyq partiia Jogorký keńeshke ótken. Osydan keiin 5 qazanda jurt "bilikke jaqyn partiialar jurttyń daýysyn satyp aldy, ákimshilik resýrstardy paidalandy" dep, nátijemen kelispei narazylyqqa shyqty.
- 6 qazanǵa aýǵan túni narazylar parlament pen prezident otyratyn "Aq úidi", Memlekettik ulttyq qaýipsizdik komitetiniń ǵimaratyn basyp alǵan. Narazylyqtan soń Ortalyq sailaý komissiiasy daýys berý nátijesin joiyp, qaita sailaý ótkizetinin málimdedi.
