Qyrǵyzstan ulttyq qaýipsizdik jónindegi memlekettik komiteti burynǵy premer-ministr Mýhammedkalyi Abylgazievti ustady. Bul týraly qupiia derekkózge súiengen Azattyqtyń Qyrǵyz qyzmeti habarlady.
Aqparatqa qaraǵanda, Abylgaziev 26 qańtarda ulttyq qaýipsizdik komitetine shaqyrtylyp, izinshe qamaýǵa alynǵan. Burynǵy premer-ministr "zańsyz joldarmen baiydy" degen kúdikke ilinip otyr.
Kei málimet boiynsha, Abylgaziev ústinen qozǵalǵan qylmystyq is Qumtór kenishin igerý boiynsha jasalǵan sońǵy kelisimmen bailanysty bolýy múmkin.
Qyrǵyzstan ulttyq qaýipsizdik jónindegi memlekettik komiteti Abylgazievtiń ustalýyna bailanysty túsinikteme bermedi.
53 jastaǵy Mýhammedkalyi Abylgaziev 2018-2020 jyldary úkimetti basqarǵan. Byltyr 15 maýsymda - elde koronavirýs indeti kúsheiip turǵan tusta qyzmetinen ketti.
20 qazanda qarjy politsiiasy burynǵy premer-ministrge elden ketýge tyiym salynǵanyn habarlady. Biraq naqty qai iske bailanysty shekteý qoiylǵanyn naqtylamady. Ertesinde tergeýge shaqyryldy.
