Qyrǵyzstan densaýlyq saqtaý ministrliginiń baspasóz qyzmeti 20 sáýirde eki adamnyń ýqorǵasynnan ýlanyp, aýrýhanaǵa túskenin habarlady. Ministrlik málimetinshe, seisenbi kúni Bishkek travmotologiia jáne ortopediia ǵylymi-zertteý ortalyǵynyń toksikologiia bólimine 1950 jáne 1955 jylǵy erli-zaiyptylar jaǵdaiy aýyr kúide túsken. Aldyn ala diagnoz – ýqorǵasynnan ýlaný.
"Patsientterdiń sózine qaraǵanda, olar uzaq ýaqyt emdik maqsatynda ýqorǵasyn tunbasyn iship, jaqyn arada dozasyn ulǵaitqan. Júrek-qantamyr qyzmeti qalpyna kelgennen keiin zardap shekkenderdiń jaǵdaiy turaqtandy. Intensivti terapiia jalǵasyp jatyr" dedi ministrlik ókilderi.
Vedomstvo sonymen birge 20 sáýirde 1958 jylǵy er adamnyń ulttyq kardiologiia jáne terapiia ortalyǵynyń reanimatsiia bólimine túskenin aitty. Buǵan deiin aqparat quraldary er adamnyń jedel járdem qyzmeti ókilderine ýqorǵasyndy ishkenin habarlaǵanyn jazǵan. Ministrliktiń málimetinshe, er adam aýrýhanaǵa jaǵdaiy aýyr kúide túsken. Naýqasta álsizdik, júrek ainýy, loqsý, júrek aqaýy belgileri bolǵan. Aldyn ala diagnozy – belgisiz zatpen ýlaný. Mamandar ýly zattyń quramyn anyqtap jatyr.
15 sáýirde Qyrǵyzstan prezidenti Sadyr Japarov Facebook-taǵy paraqshasynda "koronavirýstan 1-2 kún ishinde emdeitin dári tabylǵanyn" habarlaǵan. Bul aqparatqa ilese birneshe adamnyń arnaiy jabdyqtyń kómegimen plastik bótelkege suiyqtyq quiyp jatqany týraly video da taraǵan. Bótelke syrtynda "Ystyqkól tamyry" degen jazý bar.
Ertesinde densaýlyq saqtaý ministri Alymkadyr Beishenaliev baspasóz jiynynda memleket basshysynyń dárigerlerdi "qalai oqytyp" jatqanyn aityp bergen. Ministrdiń aitýynsha, ýly ósimdiktiń tunbasyn qalai jasaý kerektigin Japarov qana biledi. Sonyń kómegimen 350-den astam naýqas emdelip shyqqan-mys.
Birqatar sarapshylar men dárigerler sheneýnikke Ystyqkól tamyry nemese ýqorǵasynnyń óte ýly ósimdik ekenin, tipti ony dene syrtyna qoldaný qaýipti ekenin eskertken. Dúniejúzilik densaýlyq saqtaý uiymy klinikalyq synaqtan ótpegen preparattyń tirkelýi múmkin emes ekenin jáne paidalanýǵa usynylmaitynyn aitqan.
Buǵan deiin Facebook jelisi "áleýmettik jeli erejesin buzǵany úshin" Sadyr Japarovtyń ýqorǵasyn jaily jazbasyn óshirgen. Prezidenttiń Instagram-daǵy jazbasy da joiylǵan.
