4 sáýirde Qyrǵyzstan prezidenti Sadyr Japarov Aýǵanstannan kóship kelip, Osh oblysynyń Alai aýdany Taldy-Sýý aýylynda turyp jatqan qyrǵyzdarmen kezdesti.
Qyrǵyzstan prezidenti baspasóz qyzmetiniń habarlaýynsha Taldy-Sýýda olarǵa jer telimi bólingen, onda 17 otbasyna 11 úi salynǵan. Buǵan qosa, taǵy bir aýdanda Aýǵanstannyń Pamir taýlarynda birneshe ǵasyr turyp jatqan "Pamir qyrǵyzdaryna" arnap baspana salynady.
"Memleket basshysy Pamir qyrǵyzdaryna tezirek eldi meken ashý qajettigin alǵa tartty. Bilim jáne áleýmettik mekemeler jaǵyn da qarastyrý kerektigin atap ótti. Pamir qyrǵyzdarymen kezdesken Sadyr Japarov Aýǵanstandaǵy qyrǵyzdardy aldaǵy qysqa deiin kóshirýge kúsh salatynyn aitty. Buǵan memlekettiń shamasy jetedi" delingen Qyrǵyzstan prezidenti baspasóz qyzmetiniń habarlamasynda.
Degenmen Aýǵanstannan qansha qyrǵyz otbasynyń kóshiriletini jáne oǵan biýdjetten qansha qarajat qarastyrylǵany aitylmaidy.
Taldy-Sýýda Pamir qyrǵyzdaryna arnap baspana salynatyny 2020 jyly mamyr aiynda habarlandy. Aýǵanstannan qyrǵyzdardyń alǵashqy legi 2019 jyldyń sońynda kele bastaǵan. Olar basynda mektep ǵimarattaryn panalady.
2017 jyly Naryn oblysyna 50 qyrǵyz otbasy kóship kelgen. Azamattyq pen baspana ala almaǵan bir bóliginiń Aýǵanstanǵa qaityp oralǵany da habarlandy.
