Qyrǵyzstanda narazylar talap etken soń burynǵy prezident Almazbek Atambaev, burynǵy premer-ministr Sapar Isakovty qamaýdan bosatty. Azattyqtyń Qyrǵyz qyzmetiniń habarlaýynsha, buǵan qosa burynǵy depýtat Sadyr Japarov, burynǵy depýtat Ravshan Jeenbekov te bostandyqqa shyqqan. Almazbaevtyń advokaty zań boiynsha, olardyń isi jaqyn arada qaita qaralyp, aqtalýy tiis dep málimdegen.
Qyrǵyzstanda parlament sailaýynyń nátijesimen kelispegen narazy top 5 qazanda kúndiz Bishkek ortalyǵynda miting ótkizip, Jeenbekovtiń bilikten ketýin, qaita sailaý ótkizýdi talap etken edi. Keshke qarai parlament pen prezident ákimshiligi mańynda narazylar men politsiia qaqtyǵysyp qalǵan. Narazylardy taratýǵa tyrysqan kúshtik qurylym ókilderi kózden jas aǵyzatyn gaz, rezeńke oq, tútin qutylar qoldanǵan, sý shashqan. Ondaǵan adam jaralanǵan. Keiinirek narazy top parlament ǵimaratyna enip, politsiia men arnaiy jasaq olarǵa eshqandai qarsylyq kórsetpegen.
6 qazanǵa qaraǵan túni narazylar Aq úidi basyp alǵannan keiin olar memlekettik ulttyq qaýipsizdik komiteti (MUQK) ǵimaratyna qarai jyljyǵan. MUQK ǵimaratyn kúzetken kúshtik qurylym ókilderi qoldaryn kóterip shyǵyp, halyqpen birge ekenin aitqan. MUQK basshylyǵymen kelissóz jasaǵannan keiin tergeý izoliatorda qamaýda bolǵan burynǵy prezident Almazbek Atambaev Bishkek ýaqytymen tańǵy saǵat 4:30 shamasynda bosap shyqqan. Narazylar baqylaýyna ótken qoǵamdyq KTRK arnasy jurtty urlyq, tonaýdan aýlaq júrýge shaqyrǵan.
Prezident Sooronbai Jeenbekov saiasi kúshter "beibitshilik pen turaqtylyq" saqtaidy dep úmittenetinin jetkizgen. Onyń sózin prezidenttiń baspasóz hatshysy Tolgonai Stamalieva jetkizgen. Buǵan deiin ol memleket basshysynyń Bishkekte ekenin aitqan.
