8 qarasha kúni túske deiin Qyrǵyzstannyń Qazaqstanmen shekarasyndaǵy "Aq-Tilek" tekserý jáne ótkizý beketinde 40 shaqty júk kóligi turǵan. Qyrǵyzstannyń memlekettik shekara qyzmetiniń Azattyqttyń Qyrǵyz redaktsiiasyna habarlaýynsha, sońǵy birneshe kúnde bekettegi kezek birneshe ese azaiǵan.
Vedomstvo málimetinshe, 5 qarasha - jeksenbide qazaqstandyq shekarashylar "Aq-Tilekten" 195 júk kóligin ótkizgen. Qazaqstan shekarada tekserýdi kúsheitken 10 qazannan beri munshalyqty kóp júk kóligin ótkizbegen.
"Qazaqstan tarapynyń qadaǵalaýy ózgergen joq. Kezek shekarashylar qyrǵyz premer-miinstri Sapar Isakov Astanada Qazaqstan premer-ministrimen kezdesýinde keliskendei bos júk kólikterin tekserýsiz ótkizip jatqandyqtan azaiyp otyr. Ortasha eseppen alǵanda, shekarada turǵan 50 júk kóliginiń 20-sy bos. Olardy tekserýsiz ótkizip jatyr" dep habarlady shekara qyzmeti.
Vedomstvo "Aq-Tilektegi" kezektiń azaiýynyń taǵy bir yqtimal sebebi óndirýshiler men kásipkerlerdiń taýaryn ótkizýdiń basqa joldaryn izdestirýinde bolýy múmkin ekenin aitady.
Osy apta bastalǵaly beri "Aq-Tilektegi" kezek birneshe esege azaiǵan. 6 qarasha kúni kúndiz bekette barlyǵy 30 júk kóligi bolǵan.
Sonymen qatar "Aq-Jol" beketinde de kezek baiqalmaidy. Munda negizinen jolaýshylar kólikteri, avtobýstar, taksiler men jeke adamdar ótedi. Biraq jaǵdai tústen keiin ózgerýi múmkin. Sebebi keiir kúnderi "Aq-Jolda" saǵat 11 men 17 arasynda 200-ge deiin adam kezekte turady.
Talas oblysyndaǵy "Chon-Kapka" beketinde 90-ǵa jýyq júk kóligi men jeńil kólik tur. Shý oblysyndaǵy "Chaldybar" beketinde kezek joq.
7 qazanda Qyrǵyzstan prezidenti Almazbek Atambaev prezidenttikke keibir kandidattar men Qazaqstan biliginiń atyna qatar syn aitqan. Osydan kóp uzamai, 10 qazanda Qazaqstan Qyrǵyzstanmen shekarada tekserýdi kúsheitip, shekaranyń qyrǵyz jaǵynda júk kólikteriniń kezegi paida bolǵan. Taraptar 19 qazannan bastap jolaýshylar kóligi men júgi bar jolaýshylardy ótkizýdi jeńildetýge kelisken bolatyn.
Astana shekaradaǵy tekserýdi Qyrǵyzstannan keletin "kontrabandamen kúresý úshin" kúsheitkenin aitady. Bishkek Qazaqstan shekarada "qoldan kedergi jasap otyrǵanyn" aitady.
