QR Ishki ister ministriniń orynbasary Rashid Jaqypov elimizdegi qylmystylyq ahýalyna qatysty túsinik berdi, dep habarlaidy QazAqparat.
«Sońǵy bes jylda Qazaqstanda qylmystylyq deńgeii tómendeý úrdisin kórsetip keledi. Bul aýyr jáne asa aýyr qylmystarǵa da qatysty. Sonymen qatar, ótken jyly alǵash ret urlyq sekildi keńinen taraǵan qylmystyń túri boiynsha faktiler azaidy», - dedi ol Astanada ótken baspasóz máslihatynda.
Osy oraida Rashid Jaqypov elimizdiń óńirlerinde jergilikti bilik organdary quqyq qorǵaý organdarymen birlese aldyn alý sharalaryn qabyldap jatqanyn jetkizdi.
«Qalalar men kósheler beinebaqylaý kameralarymen, turǵyn úi keshenderi de osyndai júielermen jabdyqtalýda. Kóńil kóteretin oryndarǵa qatysty baqylaýdy kúsheitýdemiz. Bul baǵyttaǵy jumystar óziniń nátijesin berip keledi. Jalpy, qylmystylyq deńgeii azaiýda. Sońǵy jyldardaǵy statistikaǵa qarasaq, bul kórsetkishterdi kórýge bolady. Búginde árbir is boiynsha sotqa deiingi tergeý bastalady. Onyń maqsaty - janjaldyń mán-jaiyn zerttep, aiyptylardy anyqtaý», - dedi ministrdiń orynbasary.
Onyń paiymynsha, qylmystylyqty jalǵyz politsiianyń kúsh-jigerimen joiý múmkin emes.
«Meniń oiymsha, qoǵam men quqyq qorǵaý organdary shynymen de birigip jumys istese, onda qylmystylyqpen kúreste eleýli ilgerileýshilik jasaimyz», - dep túidi ol.
Aita keteiik, Rashid Jaqypov baspasóz máslihatynda Denis Tenniń ólimine qatysty taraǵan qaýesetterge jaýap berdi.
