Yqylas atyndaǵy halyq mýzykalyq aspaptar mýzeiiniń, kontsert zalynda kúishi Maǵaýiia Hamzindi eske alýǵa arnalǵan «HH ǵasyrdyń kúi maitalmany Maǵaýiia Hamzin 90 jasta» atty shyǵarmashylyq kesh ótti.
Qazaqstannyń halyq ártisi, qazaqtyń dáýlesker kúishisi Maǵaýiia Hamzinniń 90 jyldyǵyna bailanysty is-sharalardyń legi Temirbek Júrgenov atyndaǵy Qazaq ulttyq óner akademiiasynda bastaý alyp, Yqylas atyndaǵy halyq mýzykalyq aspaptar mýzeiinde jalǵasyn tapty. Maǵaýiia Hamzin – qazaqtyń ulttyq ónerine, onyń ishinde sonaý túrki dáýirinen búgingi tańǵa deiingi saf qalpyn saqtap kele jatyrǵan, kúi óneriniń maitalmany. Kúishiniń mýzeide jalǵasyn taýyp, ótip jatyrǵan keshiniń ózindik máni bar. Sebebi mýzeide Maǵaýiia Hamzinniń dombyrasy saqtaýly tur. Kúishilik ónerdiń ishindegi shertpe kúi salasyna eńbegin sińirip, qoltańbasyn qaldyrǵan Maǵaýiia Hamzin, ásirese Táttimbettiń kúilerin úlken sheberlikpen bizge jetkizdi, sol siiaqty óz janynan da kóptegen kúiler shyǵardy. Kúi tartyp qana qoimaǵan ol, Batys Eýropanyń klassikalyq mýzykalaryn Motsarttyń, Bramstyń, Rahmanidtiń sol siiaqty shetel kompozitorlarynyń kóptegen týyndylaryn dombyraǵa laiyqtap tartýshy, alǵashqy dombyrashylardyń biri. Bylaisha aitqanda, virtýoz kúishi degen ataq alǵan, dáýlesker kúishi. Maǵaýiia Hamzin negizinen Táttimbettiń kúilerin úlken sahnalyq deńgeige kótergen birden-bir oryndaýshy.
Keshti júrgizgen, QR mádeniet qairatkeri, kúishi Murat Ábýǵazy. Kontserttiń shymyldyǵy Maǵaýiianyń oryndaýyndaǵy Táttimbettiń kúii «Bestóre», Áshimtaidyń kúii «Qońyrqazben» ashyldy. Oryndǵan Qazaq ulttyq óner akademiiasynyń stýdenti Aisarbek Aqiiashev. Kelesi bolyp, ataqty bulul ánshi Dánesh Raqyshevtyń tól shákirti, tanymal ánshi – Nurjan Janpeiisov shyǵyp Ásettiń «Qysmet», «Ahaý jalǵan» ánderin áýeletip, zaldy dúr silkindirdi. Keshte Maǵaýiia Hamzinniń segiz qyrlylyǵyn kórsetetin, jáne bir ereksheligi, óziniń tartatyn dombyrasyn ózi jasap alatyn qolóner sheberi bolǵandyǵy da aityldy. Kúishi dombyrasyn únemi jańashalap otyrǵan. Sahnaǵa Maǵaýiianyń jolyn qýyp júrgen, ózi sheber ári kúishi – Talant Tejekenov shyqty. Maǵaýiia Hamzinniń oryndaýynda bizdiń zamanymyzǵa jetkizgen erekshe kúidiń biri, Dairabaidyń «Dairabai» kúii jáne aitýly kúishi Tólegen Mombekovtyń «Asý» kúileri oryndaldy. Ańshylyq, balyqshylyqpen de ainalysqan Maǵaýiia Hamzin birde, Balqash mańynda bir qariianyń áńgimesin tyńdaidy. Qariianyń jalǵyz uly soǵysqa ketip habar-osharsyz oralmai qalǵan. Sodan kúishi, qariianyń zildi áńgimesinen tebirenip ketip ómirge «Belgisiz soldat» atty kúi ákeledi. Keshte «Belgisiz soldat» kúiin, jas kúishi Syrym Nurmoldin oryndady. Maǵaýiia Hamzin kóp jyldar boiy qazirgi Júsipbek Elebekov atyndaǵy estrada-tsirk kolledjinde dáris berip, kóptegen shákirt tárbielegen. Kelesi bolyp shyqqan ónerpaz, atalǵan oqý orynynyń 1 kýrs stýdenti Beket Beksultan Táttimbettiń kúii «Sylqyldaqty» tartyp kópshiliktiń qoshemetine bólendi. Sonan keiin ortaǵa Júsipbek Elebekov atyndaǵy estrada-tsirk kolledjiniń oqytýshysy Nurlan Túmenbaev shyǵyp Maǵaýiia Hamzinniń keremet kúii «Jailaýdy» jáne aitýly kúishi Boranqul Kóshmaǵambetulynyń ómiriniń sońǵy kezeńinde shyǵarǵan kúii, sirek oryndalatyn kúi «Boranquldyń kúii jurtta qalǵandy» oryndady. Adamnyń 62 tamyryn boilai tartylatyn «Qosbasar» kúileriniń ishindegi bir nusqasy «Qosbasardy», belgili kúishi Erbolat Mustafa kúmbirletti. Ábdidiń kúii «Zarqosbasardy» keshti júrgizgen Murat Ábýǵazy ózi oryndap shyqty. Sondai-aq Maǵaýiia Hamzinniń aldyn kórgen, tikelei shákirtteriniń biri, Aqqyz Ahmetova syndy qazaqtyń kúishi qyzdarynyń izin basyp júrgen Sáýle Qanieva, kúishiniń janynan shyǵarǵan «Shopan kúiin», Táttimbettiń «Kókeikesti» kúilerin oryndap kópshilikti tamsandyrdy.
Maǵaýiia Hamzinniń atyna arnalǵan is-sharalardyń túiini Yqylas atyndaǵy halyq mýzykalyq aspaptar mýzeiinde túiildi. Kórermenderdiń qoshemetimen ónerpazdar ortaǵa shaqyrylyp, mýzeidiń basshysy, QR eńbek sińirgen qairatkeri, belgili jyrshy Uljan Baibosynova, QR eńbek sińirgen qairatkeri, kúishi Jarqyn Shákerim, belgili qoǵam qairatkeri Jumabek Tabyn, QR eńbek sińirgen qairatkeri, ánshi Ramazan Stamǵazievter sahnaǵa kóterilip, kúishiniń ómiri men óneri jóninde estelikterimen bólisti. Ónerpazdar alǵys hattarmen marapattaldy. Qazaq óneriniń uly kúishisi, shertpe kúidiń enshisin búgingi kúnge jetkizip ketken, ata jolyn qýǵan ataqty kúishi ári sheber – Maǵaýiia Hamzin atyna arnalyp ótken kontsert, joǵary deńgeide ótti. Aldaǵy ýaqytta da ulylardyń aspaptaryn saqtap otyrǵan qara shańyraq, bul kúnde kieli shańyraqqa ainalǵan mýzeidiń sahnasynda, qazaqtyń ulttyq óneri nasihatalyp, daryndy ul-qyzdary ulyqtala bermek.
Baqytjan Qalniiaz,
Yqylas atyndaǵy halyq mýzykalyq
aspaptar mýzeiiniń
aǵa ǵylymi qyzmetkeri.
Ult portaly
