QR AShM Veterinarlyq baqylaý jáne qadaǵalaý komiteti tóraǵasynyń mindetin atqarýshy Tursyn Qabdoldanov memleket qandai jaǵdaida qus tumaýynan qyrylǵan qustar boiynsha sharýa iesiniń shyǵynyn ótep beretinin túsindirip berdi, dep habarlaidy QazAqparat.
Aita ketsek OKQ-da ótken baspasóz máslihaty barysynda komitet basshysynan SQO Qyzyljar aýdany Iakor aýylyndaǵy qus fabrikasynda 520 myńnan astam qustyń óltirilgeni týraly aqparattyń mán-jaiy suralǵan edi.
«Ol aýyldaǵy qus fabrikasyna baryp, jumys toby mán-jaidyń bárin tekserdi. Tekseris kezinde anyqtalǵanyndai, ondaǵy ólgen qustardyń 256 myńy aýanyń jetpegeninen tunshyǵyp ólgen. Ol – qus tumaýynan emes. Jalpy fabrikalardy teksergen kezde bizde qus óndirýshi kásiporyndardyń mindetteri – jabyq kúidegi mekeme retinde tanylýy kerek. Sondyqtan ol jerde vaktsina qoldanylmaidy. Álemdik tájiribe solai. Eger qus ósirýshi kompaniia óz mekemesinde qustyń jabaiy ańdarmen bailanysqa túspeitindei jaǵdai jasap, ustap otyrsa boldy. Qazir biz qus tumaýy boiynsha eki fabrikany ǵana tekserip jatyrmyz», - dedi Tursyn Qabdoldanov OKQ-da ótken baspasóz máslihatynda.
Onyń aitýynsha osy eki fabrikada veterinarlyq talaptardyń oryndalmaǵany belgili bolǵan.
«Azyq-túlik daiyndaityn bólimsheleriniń tóbesiniń bári ashyq. Onyń ishinde jabaiy qustar júr. Beri jaǵynda osy mekemelerdegi veterinarlyq mamannyń tipti qolynda diplomy da joq. Sol jerde qus ósirýshi bolyp istegen maman veterinarlyq dáriger bolyp ketken. Maman bolmaǵannan keiin ol jerdegi veterinarlyq talaptardyń oryndalýy ekiushty másele. Sol mekemelerdi tekserip barý úshin ońailyqpen kire almaisyń. Moratorii baryn bilesizder. Qus fabrikalaryn jii tekserýge múmkindik taǵy joq», - dedi ol.
Tursyn Qabdoldanov qus fabrikalaryndaǵy adamdar ólgen qustardyń bárin veterinarlyq dárigerlerge aitpai, kómip tastasa, kómilgen maldan synama alyp tekserýge múmkindik joq ekenin aitady. Kómilgen qusqa qazyp alyp, qaita diagnoz qoiý múmkin emes.
«Zerthanaǵa ákelinetin qus synamasynyń óziniń de talaby bar. Baryp teksergen kezde osy qus ustap otyrǵan 5-6 qorada aýa jetpei qustyń tunshyǵyp ólgeni týraly moiyndalǵan aktiler bar. Soǵan bailanysty biz memlekettik mekeme retinde naǵyz ári naqty ólgeni dáleldengen, qolynda saraptamasy bar jaǵdaida ǵana Úkimettiń esebinen ólgen qustyń ortasha baǵasy tólenetinin habarlaimyz. Al jeke mekeme ustap otyrǵan qusyn basqa jabaiy ańdarmen bailanysyn boldyrmaýyn qamtamasyz etpese, qorasynyń aýasynyń qalypty jaǵdaida turýyn qamtymasa, oǵan Úkimet tarapynan qarjy jumsalyp, shyǵynyn tóleýge quqyly emespiz. Bizdegi zańdylyq talaptary osyndai», - dedi ol.
