Kýrsant óliminen keiin Almatydaǵy ishki ister ministrligi akademiiasynyń basshysy qyzmetinen ketti. Ishki ister ministrligi 23 jeltoqsanda akademiia basshysy "ózine senip tapsyrylǵan bólimniń jumysyn qajetti dárejede baqylai almady" dep málimdedi.
Oqý orny basshysy Ómirbai Smailovpen qatar akademiianyń taǵy alty qyzmetkeri jumystan ketken. Arasynda tárbie-ideologiialyq jumystar jónindegi orynbasar da bar.
"Maqan Esbolatov atyndaǵy IIM Almaty akademiiasynyń kýrsanty Salamat Ótegenovtiń qaza tabýyna bailanysty Almaty qalasynyń Politsiia departamenti QR QK-niń 105-baby (óz-ózine qol jumsaýǵa jetkizý) boiynsha sotqa deiingi tergeý júrgizýde. Tergeý barysynda qaza tapqan adamnyń týystary baiandaǵan barlyq dálelder tekseriletin bolady.
Oqý ornyna Ishki ister ministrliginiń Kadr saiasaty jáne ózindik qaýipsizdik departamentteriniń basshylyǵy men jaýapty qyzmetkerlerinen arnaiy top jiberildi.
Tekserý qorytyndysy boiynsha IIM-de tártiptik komissiia ótti.
Ózine senip tapsyrylǵan bólimshede jumysty uiymdastyrýǵa tiisti baqylaý júrgizbegendikten Ishki ister ministriniń buiryǵymen Akademiia bastyǵy O. H. Smaiylov atqaryp otyrǵan laýazymynan bosatyldy.
Sondai-aq, onyń ideologiialyq tárbie jáne kadr jumysyna jetekshilik etetin orynbasaryn da qyzmetinen bosatý usynyldy.
Sonymen qatar, Akademiianyń taǵy 16 jaýapty qyzmetkeri qatań tártiptik jaýapkershilikke tartyldy, olardyń 5-eýi atqaryp otyrǵan laýazymdarynan bosatyldy.
Akademiianyń oqý protsesine, turmystyq jaǵdailaryna, moraldyq-psihologiialyq ahýalyna, qarjy-sharýashylyq qyzmetine keshendi tekserý taǵaiyndaldy. Oqý ornyna Ministrliktiń Ishki aýdit, Kadr saiasaty jáne Ózindik qaýipsizdik departamentteriniń qyzmetkerleri jiberildi.
Ministr Erlan Turǵymbaevtyń tapsyrmasy boiynsha osyndai tekserýler 2021 jyldyń 1 toqsanynda IIM-niń barlyq oqý oryndarynda júrgiziledi", delingen IIM málimdemesinde.
Akademiianyń úshinshi kýrsynda oqyǵan 19 jastaǵy Salamat Ótegenovtiń darǵa asylǵan denesi 13 jeltoqsanda oqý ornynyń ashanasynan tabylǵan. Marqumnyń týystarynyń sózine súiengen "Ýralskaia nedelia" basylymynyń jazýynsha, Ótegenov ata-anasynan "sessiia tapsyrý úshin", "qaryz óteý úshin" jii aqsha suraǵan jáne bul jaily eshkimge tis jarmaýyn ótingen. Óleriniń aldynda bir kún buryn kýrsant aǵasynan 300 myń teńge aýdarýdy ótingen, áitpese "aiaǵy men qolynan aiyrylatynyn" aitqan. Messenjerde jazǵan sońǵy habarlamasynda Ótegenov týystaryna beldiktiń sýretin jiberip "men kettim" dep habarlama jibergen. Keiinirek darǵa asylǵan denesi tabylǵan.
Kýrsanttyń anasy aimaqtyq basylymǵa oqý orny memleketke qarasa da, ata-analar balalaryna formany ózderi satyp áperip, qajetti zattarmen qamtamasyz etetinin aitqan. Ulynyń stipendiia alatyn bank kartochkasy da ózgelerdiń qolynda bolǵan.
Oqiǵaǵa bailanysty "sýitsidke itermeleý" baby (Qylmystyq kodekstiń 105-bap, 1-bólimi) boiynsha sotqa deiingi tergeý amaldary bastalǵan. Akademiia basshylyǵy aqsha jinaý týraly aqparatqa túsinikteme bermegen.
